Dhjetë ditë pas dënimit të Hashim Thaçit, shtëpia e familjes Xhymshiti u gjet e djegur

Para dhe pas dënimit të Thaçit dhe të tjerëve, Vudi Xhymshiti u quajt “spiun”, u kërcënua në Hagë dhe u shënjestrua me retorikë vdekjeje. Pastaj shtëpia e tij u dogj. Gazetarët në Kosovë po heshtin.

Gazetari investigativ Vudi Xhymshiti ka deklaruar se djegia e shtëpisë së prindërve të tij të ndjerë në Livoç të Ulët të Gjilanit duhet të hetohet në kontekstin e kërcënimeve dhe shënjestrimit që e kanë shoqëruar punën e tij gazetareske. Deklaratat u bënë në “Kafe Shqeto”, në intervistën e tij të parë për një transmetues në Shqipëri pas zbulimit të shtëpisë së djegur.

Pamje nga shtëpia e djegur e Prindërve të Vudi Xhymshitit në Livoç të Ulët, Gjilan. [26 Shtator, 2026]

Xhymshiti, themelues dhe kryeredaktor i The Frontline Media Group me seli në Londër, foli me gazetarin Flavio Qarri disa ditë pasi Policia e Kosovës nisi hetimet për veprën penale të zjarrvënies. Policia ka konfirmuar se shtëpia ishte e pabanuar dhe se zjarri kishte shkaktuar dëme në bodrum, ku ndodheshin një veturë, mjete pune dhe orendi shtëpiake. Në vendngjarje kanë dalë hetuesit, Krimteknika Rajonale dhe eksperti për zjarre. Koha e saktë e zjarrit dhe shkaku i tij nuk janë përcaktuar ende. Pas konsultimit me Prokurorin e Shtetit, rasti është hapur për hetim në drejtim të veprës penale “Zjarrvënie”¹.

Ky dallim është i rëndësishëm. Shtëpia u gjet e djegur dhe rasti u raportua më 26 shtator, por kjo nuk do të thotë se zjarri ka ndodhur atë ditë. Frontline Media Group ka kërkuar që hetuesit të përcaktojnë kohën dhe shkakun e zjarrit dhe, nëse ekspertiza e konfirmon se ai është vënë qëllimisht, t’i identifikojnë autorët dhe ta shqyrtojnë nëse ekziston lidhje me kërcënimet e mëhershme ndaj Xhymshitit².

Në intervistën me Qarrin, Xhymshiti tha se ngjarja nuk e kishte frikësuar dhe se, përkundrazi, e kishte forcuar vendosmërinë e tij për ta vazhduar punën hulumtuese.

“Krenar, më i fortë se kurrë”, tha ai, duke shtuar se redaksia e tij do të vazhdojë hulumtimet mbi dhunën politike, krimin e organizuar, ndikimin serb dhe rus dhe rrjetet që Frontline Media Group i ka hetuar gjatë tre vjetëve të fundit³.

“Incidenti është shpërfaqje e karakterit të rrjeteve kriminale të cilat kanë qenë subjekti i punëve të mia gazetareske tashmë në tre vitet e fundit”, tha Xhymshiti.

---

Ai deklaroi se njerëz dhe rrjete të prekura nga hulumtimet e redaksisë kishin provuar më herët ta korruptonin, kërcënonin dhe komprometonin. Përgjegjësia për zjarrin e fundit, megjithatë, mbetet çështje që duhet ta përcaktojnë Policia dhe Prokuroria thotë ai ^[3].

Ngjarja ka ndodhur në një periudhë jashtëzakonisht të ndjeshme. Vetëm dhjetë ditë përpara se shtëpia të gjendej e djegur, Dhomat e Specializuara të Kosovës në Hagë e shpallën aktgjykimin e shkallës së parë kundër Hashim Thaçit, Kadri Veselit, Rexhep Selimit dhe Jakup Krasniqit. Më 16 shtator, Trupi Gjykues i shpalli të katër penalisht përgjegjës për krimet e luftës të ndalimit arbitrar, trajtimit mizor, torturës dhe vrasjes. Thaçi dhe Krasniqi u dënuan me nga 25 vjet burgim, Veseli me 18 vjet dhe Selimi me 13 vjet. Ata u shpallën të pafajshëm për krime kundër njerëzimit⁴.

Aktgjykimi përcaktoi përgjegjësi penale për ndalimin arbitrar të 385 personave, trajtimin mizor të 49 personave, torturimin e 303 personave dhe vrasjen e 96 personave. Gjykatësit konstatuan se të katër të akuzuarit kishin kontribuar ndjeshëm në një qëllim të përbashkët kriminal për shënjestrimin e personave që konsideroheshin kundërshtarë të objektivave politike dhe ushtarake të UÇK-së. Mes tyre kishte shqiptarë të Kosovës të lidhur me forca të tjera politike ose ushtarake, përfshirë LDK-në dhe FARK-un, persona të akuzuar për lidhje me autoritetet serbe ose jugosllave dhe pjesëtarë të komuniteteve rom dhe serb ^[4].

Aktgjykimi e përcakton përgjegjësinë individuale të të dënuarve dhe jo përgjegjësinë kolektive të UÇK-së. As lufta çlirimtare e Kosovës dhe as legjitimiteti i rezistencës kundër regjimit serb nuk ishin objekt i gjykimit. Por gjetjet e Trupit Gjykues kanë rëndësi për kronologjinë aktuale sepse dokumentojnë se etiketimi i kundërshtarëve si bashkëpunëtorë ose armiq ishte pjesë e mjedisit në të cilin u kryen krimet e provuara nga gjykata ^[4].

Xhymshiti dhe redaktori politik i Frontline Media Group, Michael Sheppard, ndodheshin në Hagë për ta raportuar aktgjykimin. Frontline Media Group dokumentoi se të dy u përballën me shtyrje, kërcënime dhe frikësim jashtë gjykatës, përpara se Policia holandeze t’i largonte nga zona nën përcjellje⁵.

Gjatë tensioneve, kryetari i Organizatës së Veteranëve të Luftës së UÇK-së, Hysni Gucati, iu drejtua turmës lidhur me Xhymshitin. Pamjet e publikuara nga vendi i ngjarjes dokumentojnë Gucatin duke u kërkuar të pranishmëve të mos merren me gazetarin dhe duke e quajtur atë “bashkëpunëtor”, “idiot”, “spiun” dhe duke insinuuar se Xhymshitit mund t’’jetë nga Rusia ose Serbia⁶.

Një ditë më vonë, Frontline Media Group dokumentoi një video të publikuar në Facebook ku shfaqeshin fotografitë e Xhymshitit dhe ministres së Jashtme të Kosovës, Donika Gërvalla. Në material ata etiketoheshin si “spiunë”, thuhej se “kanë me dek” dhe përshkruhej një pikë në ballë që, sipas zërit në video, tregonte vendin “ku me rrok plumi”. Frontline Media Group e trajtoi publikimin si kërcënim serioz ndaj sigurisë së gazetarit dhe ruajti videon, komentet dhe të dhënat shoqëruese si material për autoritetet⁷.

Frontline Media Group nuk ka pretenduar se provat e disponueshme dëshmojnë se Gucati, OVL-UÇK, PDK-ja apo ndonjë organizatë tjetër politike ka urdhëruar ose koordinuar videon apo zjarrin. Çështja që redaksia ka ngritur është kronologjia. Një gazetar u shënjestrua publikisht, u përball me intimidim fizik gjatë raportimit në Hagë, u paraqit më pas në një video ku flitej për vdekjen e tij dhe goditjen me plumb në ballë, ndërsa disa ditë më vonë shtëpia e familjes së tij u gjet e djegur. Kjo kronologji nuk e përcakton autorësinë e zjarrit, por e krijon një vijë të qartë hetimore që autoritetet duhet ta shqyrtojnë ^{[2] [5] [7]}.

Në “Kafe Shqeto”, Xhymshiti e përshkroi zjarrin në terma të drejtpërdrejtë.

“Ky është edhe veprim hakmarrës, por është edhe veprim paralajmërues”, tha ai.

Sipas tij, mesazhi që bart incidenti është “ose ndalu, ose do të vrasim”.

Ky është vlerësimi i Xhymshitit mbi ngjarjen. Hetimi penal ende nuk ka përcaktuar autorin apo motivin e zjarrit ^[3].

Sulmi ndaj pronës nuk është incidenti i parë i këtij lloji. Frontline Media Group kishte raportuar edhe më herët për dëmtimin e shtëpisë familjare. Në intervistë, Xhymshiti tha se xhamat, orenditë dhe pjesë të tjera të pronës ishin dëmtuar në një incident të mëhershëm⁸. Shtëpia ishte djegur gjithashtu gjatë luftës së vitit 1999, kur familja e tij ishte ndër familjet shqiptare të prekura nga dhuna dhe shkatërrimi i pronës gjatë fushatës së forcave serbe dhe jugosllave në Kosovë.

Intervista kaloi më pas te hulumtimet që Xhymshiti dhe Frontline Media Group i konsiderojnë pjesë të kontekstit të presionit ndaj redaksisë. Qarri e pyeti për ish-presidentin Hashim Thaçi dhe gazetarin Milaim Zeka. Xhymshiti këmbënguli se deklaratat e tij për Zekën nuk ishin akuza të improvizuara në studio, por referenca ndaj gjetjeve të hulumtimeve të zhvilluara dhe të publikuara më herët nga redaksia.

Ai iu referua hulumtimit të Frontline Media Group mbi pamjet e luftës të xhiruara nga Zeka dhe përdorimin e tyre nga producentja serbe Sladjana Zariq në prodhime që trajtonin pretendimet e rrejshme kundër UÇK-së lidhur me të ashtuquajturën “Shtëpia e Verdhë”. Xhymshiti foli gjithashtu për gjetjet e redaksisë mbi marrëdhënien e Zekës me Halit Sahitaj dhe për informacionet e siguruara nga burimet e Frontline Media Group në Suedi.

Kur Qarri sugjeroi një përballje të ardhshme televizive mes Xhymshitit dhe Zekës, Xhymshiti e refuzoi premisën. Ai tha se detyra e redaksisë është të hulumtojë, verifikojë, t’u ofrojë subjekteve të raportimit mundësinë për përgjigje dhe pastaj t’i publikojë gjetjet. Sipas tij, personave të trajtuar në këto hulumtime u është dhënë mundësia të përgjigjen dhe një debat televiziv nuk mund ta zëvendësojë përgjigjen ndaj provave dhe gjetjeve të publikuara.

Një pjesë e rëndësishme e sfondit të hulumtimit mbi Sahitajin konfirmohet edhe nga raportimi gjyqësor dhe policor në Spanjë. Gazeta El Confidencial raportoi⁹ më 16 gusht 2023 se Policia Kombëtare spanjolle kishte arrestuar Halit Sahitajin në Marbella në kuadër të një hetimi për përdorimin e dyshuar të informatave konfidenciale për zhvatjen e individëve dhe biznesmenëve. Duke cituar burime juridike dhe hetimore, gazeta e përshkroi atë si një nga njerëzit kryesorë në Spanjë të një strukture të krimit të organizuar rus dhe si njeri të afërt me Zakhar Kalashov ^[8].

Raportimi i El Confidencial për Sahitajin shtrihet përtej arrestimit të vitit 2023. Në maj 2022, gazeta raportoi se Sahitaj ishte hetuar si drejtues i dyshuar i një grupi kriminal me origjinë ruse që merrej me zhvatje dhe pastrim parash në Spanjë. Në shkurt 2023, e njëjta media raportoi se Dhoma Penale e Audiencia Nacional kishte urdhëruar vazhdimin e hetimeve mbi presionet e dyshuara ndaj ish-arkëtarit të Partisë Popullore, Luis Barcenas. Materialet e atij hetimi përfshinin regjistrime të gjetura gjatë kontrolleve të lidhura me Sahitajin ^[8].

Hulumtimi i Frontline Media Group shkon më tej se raportimi spanjoll. Duke u mbështetur në materialet dhe burimet ndërkombëtare të zhvilluara nga departamenti i hulumtimeve, redaksia ka hetuar lidhjet e dyshuara të Sahitajit me interesa të inteligjencës ruse dhe marrëdhëniet e tij me figura politike, kriminale dhe mediatike nga Kosova. Referencat e Xhymshitit në “Kafe Shqeto” ishin pjesë e këtij korpusi hulumtimesh të publikuara dhe jo pretendime të krijuara gjatë intervistës¹⁰.

Ndërkohë, reagimi mediatik në Kosovë ndaj zjarrit ka qenë i kufizuar. KALLXO.com shkoi në vendngjarje dhe siguroi konfirmimin e Policisë së Kosovës për dëmet, praninë e hetuesve dhe hapjen e rastit për zjarrvënie. Gazeta Sinjali gjithashtu kontaktoi Policinë dhe publikoi të dhënat zyrtare për rastin¹¹. Megjithatë, rasti nuk mori mbulim të krahasueshëm nga transmetuesit kryesorë kombëtarë, ndërsa deri në kohën e këtij publikimi KRONIKAT E BARUTIT nuk ka identifikuar një reagim publik të Asociacionit të Gazetarëve të Kosovës për djegien e pronës dhe kronologjinë e kërcënimeve që e parapriu atë.

Kjo heshtje ngre një çështje të rëndësishme për lirinë e medias. Nuk është e nevojshme që mediat e Kosovës të pajtohen me hulumtimet, përfundimet apo vijën editoriale të Xhymshitit. Çështja është nëse kërcënimi ndaj një gazetari trajtohet si problem i lirisë së shtypit pavarësisht se kë heton gazetari dhe sa të fuqishëm janë personat ose rrjetet e prekura nga raportimi i tij.

Pikërisht këtu qëndron rëndësia e kronologjisë. Autoritetet nuk kanë përcaktuar ende se kush e shkaktoi zjarrin dhe me çfarë motivi. Por ekzistojnë ngjarje të dokumentuara që i paraprijnë atij, përfshirë etiketimin publik të Xhymshitit, konfrontimin në Hagë dhe videon me gjuhë të drejtpërdrejtë për vdekjen dhe goditjen me plumb. Hetimi duhet ta përcaktojë nëse këto ngjarje janë të lidhura apo jo me zjarrin. Vetëm provat mund ta japin atë përgjigje.

Xhymshiti, ndërkaq, e bëri të qartë se zjarri nuk do ta ndalë punën e redaksisë. Frontline Media Group nuk po kërkon fajtorë me hamendje, por përgjigje me prova. Tash u takon institucioneve të Republikës së Kosovës ta dëshmojnë nëse janë të gatshme ta hetojnë zjarrin me të njëjtin seriozitet si vargun e kërcënimeve që e parapriu, apo nëse edhe kësaj radhe heshtja do të jetë përgjigjja e tyre.

QËNDRIM EDITORIAL: HESHTJA ËSHTË PJESË E PROBLEMIT

Policia ende nuk e ka përcaktuar kush e shkaktoi zjarrin dhe askush serioz nuk duhet ta shpikë fajtorin. Por kjo nuk u jep institucioneve, mediave dhe organizatave të lirisë së shtypit luksin për të bërë sikur asgjë nuk ka ndodhur. Rasti po hetohet për zjarrvënie, shtëpia e familjes së një gazetari është djegur pas një periudhe kërcënimesh dhe shënjestrimi publik. Këto janë fakte që kërkojnë vëmendje, jo indiferencë. (Kallxo)

Heshtja e Asociacionit të Gazetarëve të Kosovës, nëse vazhdon pa një reagim publik, është veçanërisht e rëndë. Një organizatë që pretendon se i mbron gazetarët nuk mund ta kushtëzojë solidaritetin me atë se a i pëlqen gazetari, çfarë heton ai apo kë e zemëron raportimi i tij. Liria e shtypit që mbrohet vetëm për miqtë, kolegët e afërt dhe gazetarët e padëmshëm nuk është parim. Është klub.

Edhe heshtja e një pjese të madhe të medias kosovare meriton të shënohet. KALLXO.com shkoi në vendngjarje dhe i raportoi faktet, media të tjera e transmetuan lajmin. (Kallxo) Por për një vend që flet kaq shumë për demokracinë dhe lirinë e medias, mungesa e një reagimi më të gjerë ndaj një rasti të tillë është damkosëse. Gazetaria nuk mbrohet vetëm kur viktima është “i yni”.

Qeveria dhe institucionet publike e kanë gjithashtu një përgjegjësi që shkon përtej pritjes pasive të përfundimit të ekspertizës. Nuk po kërkohet që ata ta shpallin fajtorin pa prova. Kjo situatë e kërkon që ata ta bëjnë të qartë se kërcënimi, intimidimi dhe çdo sulmet ndaj një gazetari për shkak të punës së tij do të hetohen deri në fund.

Dhe pastaj janë organizatat e misionet ndërkombëtare që prej vitesh flasin për demokraci, sundim të ligjit dhe liri të medias në Kosovë. Nëse këto parime vlejnë vetëm për konferenca, raporte vjetore dhe deklarata ceremoniale, atëherë janë zbrazur nga kuptimi. Mbrojtja e lirisë së shtypit matet pikërisht atëherë kur gazetari është i papëlqyer, hulumtimi i tij është i pakëndshëm dhe heshtja është politikisht më e leverdishme.

KRONIKAT E BARUTIT dhe The Frontline Media Group nuk po kërkojnë solidaritet sentimental. Kërkojnë standard. Hetojeni zjarrin. Hetojeni kronologjinë. Mbrojeni gazetarinë pa i zgjedhur gazetarët. Dhe ata që kanë zgjedhur heshtjen duhet ta dinë se edhe heshtja e tyre është pjesë e dokumentimit publik.

---

1

Digjet bodrumi i shtëpisë së familjes së gazetarit Vudi Xhymshyti në Gjilan

Burimi. KALLXO.com, Veronë Zymberi dhe Adelina Ahmeti, 26 shtator 2026.

Vegëza.

https://kallxo.com/lajm/digjet-bodrumi-i-shtepise-se-familjes-se-gazetarit-vudi-xhymshyti-ne-gjilan/

Përshkrimi i burimit.

Raportim nga vendngjarja që përmban konfirmimin e Policisë së Kosovës se shtëpia ishte e pabanuar, se zjarri kishte dëmtuar bodrumin, veturën, mjetet e punës dhe orenditë, se koha e saktë e zjarrit nuk ishte përcaktuar dhe se rasti ishte iniciuar për hetim në drejtim të veprës penale “Zjarrvënie”. Raportimi nuk përcakton shkakun apo autorin e zjarrit.

2

FRONTLINE MEDIA GROUP. ZJARRI DUHET HETUAR. KRONOLOGJIA NUK MUND TË SHPËRFILLET.

Burimi. Frontline Media Group dhe Kronikat e Barutit, 27 shtator 2026.

Përshkrimi i burimit.

Deklarata institucionale e Frontline Media Group mbi djegien e pronës. Ajo dokumenton qëndrimin e redaksisë se nuk dihet ende kur ka ndodhur zjarri, kush e ka shkaktuar apo nëse është vënë qëllimisht, dhe kërkon që hetimi të shqyrtojë kronologjinë e kërcënimeve që e parapriu.

3

Intervista e Vudi Xhymshitit në Kafe Shqeto me Flavio Qarrin

Burimi. Kafe Shqeto, intervistë televizive, 29 shtator 2026. Transkripti i plotë i intervistës është në posedim të redaksisë.

Vegëza e transmetimit të plotë duhet të vendoset pas arkivimit nga redaksia.

Përshkrimi i burimit.

Intervista përmban deklaratat e Xhymshitit mbi zjarrin, kërcënimet, hulumtimet e Frontline Media Group, Milaim Zekën dhe Halit Sahitajin. Përkthimet dhe citimet janë kontrolluar kundrejt transkriptit të intervistës.

4

Aktgjykimi në çështjen Thaçi dhe të tjerët

Burimi. Dhomat e Specializuara të Kosovës, Prokurori i Specializuar kundër Hashim Thaçit, Kadri Veselit, Rexhep Selimit dhe Jakup Krasniqit, KSC-BC-2020-06, 16 shtator 2026.

Vegëza.: https://prd-main.scp-ks.org/sq/hashim-thaci-dhe-te-akuzuarit-e-tjere-shpallen-fajtore-krime-lufte

Përshkrimi i burimit.

Burimi zyrtar i Dhomave të Specializuara dokumenton aktgjykimin e shkallës së parë, dënimet me burgim dhe gjetjet për 385 persona të ndaluar arbitrarisht, 49 viktima të trajtimit mizor, 303 viktima të torturës dhe 96 viktima të vrasjes. Ai dokumenton gjithashtu gjetjen e Trupit Gjykues mbi qëllimin e përbashkët kriminal për shënjestrimin e kundërshtarëve të perceptuar. Të akuzuarit u shpallën të pafajshëm për krime kundër njerëzimit.

5

Frontline Media Group Condemns Intimidation of Xhymshiti and Sheppard

Burimi. Frontline Media Group, 16 shtator 2026.

Frontline Media Group Condemns Intimidation of Xhymshiti and Sheppard

Vegëza.

Përshkrimi i burimit.

Deklarata dokumenton raportimin e Frontline Media Group për kërcënimet, shtyrjet dhe intimidimin ndaj Vudi Xhymshitit dhe Michael Sheppard gjatë punës së tyre gazetareske jashtë Dhomave të Specializuara në Hagë dhe ndërhyrjen e Policisë holandeze.

6

Gucati iu drejtohet qytetarëve. Mos u ndikoni prej Vudi Xhumshitit

Burimi. TV Syri, 16 shtator 2026.

Vegëza.

https://www.syri-vision.tv/gucati-iu-drejtohet-qytetareve-mos-u-ndikoni-prej-vudi-xhumshitit/

Përshkrimi i burimit.

Raportimi dokumenton deklaratën publike të Hysni Gucatit para turmës në Hagë. Gucati i kërkoi turmës të mos merrej me Xhymshitin, e quajti atë “zero” dhe kërkoi ruajtjen e qetësisë dhe rendit. Burimi përdoret vetëm për atë që është regjistruar dhe publikuar nga vendngjarja.

7

VIDEO TARGETING JOURNALIST VUDI XHYMSHITI AND MINISTER DONIKA GËRVALLA DEPICTS WHERE A BULLET SHOULD STRIKE THEIR FOREHEADS

Burimi. Frontline Media Group, 18 shtator 2026.

FRONTLINE MEDIA GROUP STATEMENT

Deklarata dhe materialet origjinale janë ruajtur në arkivin e Frontline Media Group. Vegëza publike duhet të vendoset nga redaksia para publikimit.

Përshkrimi i burimit.

Deklarata dokumenton videon e publikuar më 17 shtator dhe përmbajtjen e saj në gjuhën shqipe, përfshirë deklaratat se Xhymshiti dhe Donika Gërvalla “kanë me dek” dhe referencën për vendin “ku me rrok plumi”. Materiali dokumenton përmbajtjen e kërcënimit. Nuk provon se ndonjë parti ose organizatë politike e ka urdhëruar ose koordinuar publikimin.

8.

9

Raportimet e El Confidencial mbi Halit Sahitajin dhe hetimet në Spanjë

Burimi. José María Olmo dhe Pablo D. Almoguera, El Confidencial, 16 gusht 2023. José María Olmo, El Confidencial, 30 maj 2022. Alejandro Requeijo dhe José María Olmo, El Confidencial, 3 shkurt 2023.

Vegëzat.

https://www.elconfidencial.com/espana/2023-08-16/marbella-poker-policia-mafia-rusa-espana_3712742/

https://www.elconfidencial.com/espana/2022-05-30/policia-mafia-rusa-audio-reunion-silenciar-barcenas-y-salvar-al-pp_3432432/

https://www.elconfidencial.com/espana/2023-02-03/audiencia-ordena-investigar-presiones-barcenas_3569568/

Përshkrimi i burimit.

Tri raportimet dokumentojnë pjesë të ndryshme të hetimeve spanjolle që lidhen me Halit Sahitajin. Artikulli i 16 gushtit 2023 raporton arrestimin e tij në Marbella dhe hetimin për përdorimin e dyshuar të informatave konfidenciale për zhvatje. Raportimi i vitit 2022 përshkruan hetimin ndaj një grupi kriminal me origjinë ruse dhe rolin që autoritetet hetuese ia atribuonin Sahitajit. Artikulli i shkurtit 2023 dokumenton vendimin e Audiencia Nacional për vazhdimin e hetimit të një çështjeje të lidhur me regjistrime të gjetura gjatë kontrolleve në kuadër të hetimeve ku përfshihej Sahitaj. Këto raportime dokumentojnë hetimet spanjolle. Ato nuk përdoren si burimi i vetëm për gjetjet e veçanta të Frontline Media Group mbi lidhjet e dyshuara me inteligjencën ruse.

10

Brenda Komplotit për Shkatërrimin e Gjykatës Speciale

Si më ofroi një person me nofkën ‘Laky Laky’ 5,000 euro për të botuar një tregim të rremë për Richard Grenell, duke e demaskuar një rrjet të madh të dezinformimit kundër drejtësisë në Kosovë.

---

---

Në Zemër të Makinerisë së Dezinformimit

Nga Krimi te Operacionet Sekrete: Si Halit Sahitaj dhe Milaim Zeka synojnë Tribunalin e Kosovës në një luftë të rrezikshme dezinformimi. Kush janë në të vërtetë këta?

11

I digjet shtëpia e prindërve gazetarit Vudi Xhymshiti, Policia jep detaje për Sinjalin. Shtëpia ishte e pabanuar, rasti po hetohet

Burimi. Gazeta Sinjali, 26 shtator 2026.

Vegëza: https://sinjali.com/i-digjet-shtepia-e-prinderve-gazetarit-vudi-xhymshiti-policia-jep-detaje-per-sinjalin-shtepia-ishte-e-pabanuar-rasti-po-hetohet/

Përshkrimi i burimit.

Sinjali raporton konfirmimin e Policisë së Kosovës se informacioni për zjarrin ishte pranuar më 26 shtator rreth orës 15.45, se shtëpia ishte e pabanuar, se koha e saktë e zjarrit nuk dihej dhe se rasti ishte iniciuar për hetim në drejtim të veprës penale “Zjarrvënie”.