Endrit Thaçi, para se ta përdorësh fjalën “turp”, ndalu te Behajdin Allaqi.
Sepse tash nuk po flasim më për akuza politike, as për propagandë partiake. Më 16 shtator 2026, Gjykata Speciale e dënoi babanë tënd, Hashim Thaçin, me 25 vjet burg për krime lufte. Trupi gjykues konstatoi përgjegjësi penale për ndalimin arbitrar të 385 personave, trajtimin mizor të 49 personave, torturimin e 303 personave dhe vrasjen e 96 personave. Gjykata konstatoi se shumica dërrmuese e viktimave ishin civilë të pafajshëm dhe se kundërshtarët e perceptuar të UÇK-së shënjestroheshin, ndër të tjera, si “bashkëpunëtorë” ose “spiunë”, shpesh pa asnjë bazë.
Dhe për Behajdin Allaqin gjykata shkoi edhe më tej. Ajo konstatoi se babai yt mori pjesë personalisht në arrestimin, ndalimin, transferimin dhe vrasjen e tij. Kjo nuk është fjalia ime, Endrit. Nuk është as e Albin Kurtit. Është gjetje e trupit gjykues që e dënoi Hashim Thaçin me 25 vjet burgim.
Prandaj pyetja jote për “turpin” meriton një përgjigje.
Çka është më e turpshme, Endrit?
Që policia e Republikës i mbron institucionet nga një protestë që përfundoi me gurë, mjete piroteknike, të lënduar dhe arrestime, apo që Behajdin Allaqi u arrestua, u mbajt dhe u vra në një krim në të cilin gjykata konstatoi pjesëmarrjen personale të babait tënd?
Më 5 tetor protestuesit u përleshën me policinë, ndërsa policia përdori gaz lotsjellës dhe ujë për t’i shpërndarë. Kjo është ajo që duhet diskutuar mbi faktet, jo duke e kthyer çdo ndërhyrje policore në sulm ndaj UÇK-së.
Ti thua se lirinë “e solli UÇK-ja”.
Po. Lufta çlirimtare e UÇK-së është shumë më e madhe se Hashim Thaçi dhe pikërisht këtu rrëzohet argumenti yt. Prokurori Special e ka thënë shprehimisht se nuk është ndjekur penalisht UÇK-ja dhe as lufta për pavarësinë e Kosovës. Janë gjykuar individë që, sipas aktgjykimit, i shfrytëzuan rrethanat e luftës për të kryer krime të rënda. Ta barazosh babanë tënd me krejt UÇK-në nuk e mbron UÇK-në. E redukton një luftë të tërë çlirimtare në fatin juridik të një politikani vrasës.
Edhe historia politike është më kokëfortë se sllogani yt. Hashim Thaçi e udhëhoqi delegacionin shqiptar në Rambuje. Korniza e Rambujesë parashihte autonomi substanciale për Kosovën duke e respektuar sovranitetin dhe integritetin territorial të Republikës Federale të Jugosllavisë. Dokumentet e OKB-së të kohës e thonë këtë shprehimisht. Pra, kur sot kërkon që çdo kritikë ndaj babait tënd të trajtohet si tradhti ndaj idealit kombëtar, duhet ta pranosh edhe dokumentin që vetë ai e përfaqësoi dhe e nënshkroi politikisht. Historia nuk mund të përdoret vetëm në faqet që të pëlqejnë o Endrit Thaçi.
Dje ta thashë edhe më thjesht. Ti ke çdo të drejtë ta duash babanë tënd. Ai është gjallë. Mund t’ia dëgjosh zërin, mund t’i shkruash dhe mund ta vizitosh sipas rregullave të paraburgimit. Familja e Behajdin Allaqit nuk e ka atë mundësi. As familjet e njerëzve të tjerë të vrarë në krimet për të cilat gjykata konstatoi përgjegjësi penale. Ata e kanë fotografinë, varrin dhe mungesën. Aktgjykimi i numëron 96 viktima të vrasjes së babait tënd.
Prandaj mos ua shit familjeve të viktimave dhimbjen tënde sikur të ishte më e madhe se e tyrja. Dhe mos kërko që Kosova ta harrojë një aktgjykim penal sa herë që ai bëhet i dhimbshëm për familjen Thaçi. Babai yt ka të drejtë ta apelojë vendimin dhe procesi juridik duhet të vazhdojë sipas ligjit. Por ti nuk ke të drejtë morale ta shndërrosh një aktgjykim për ndalime arbitrare, torturë dhe vrasje në një akuzë kolektive kundër UÇK-së vetëm sepse kështu është më e lehtë të shmanget pyetja për viktimat.
Për pretendimet për Fondin e Çlirimit, pasurimin dhe keqpërdorimin e pushtetit, unë nuk do t’i paraqes si fakte pa dokumentin për secilën prej tyre. Nuk më duhen, sepse ka edhe të tjera viktima të babait tënd që flasin për të.
Aktgjykimi i 16 shtatorit është më i rëndë se çdo sharje dhe më shkatërrues se çdo hiperbolë.
Kështu që po ta kthej pyetjen tande, Endrit.
Kur thua se është “e turpshme” që policia godet protestues që përplasen me ta ndërsa i mbron institucionet e Republikës, shko së pari te dera e familjes së Behajdin Allaqit dhe thuaja të njëjtën fjalë atyre. Pastaj dëgjoje përgjigjen.
Sepse pyetja që mbetet nuk është vetëm kur do të kthehet Hashim Thaçi te djali i vet.
Pyetja është shumë më e rëndë.
Kush ua kthen familjeve njerëzit e vrarë në krimet për të cilat Hashim Thaçi tashmë është dënuar?
Si u vra dhe u fsheh Behajdin Allaqi
Për 28 vjet, Kosovës iu tha se Behajdin Allaqi kishte rënë dëshmor. Por askush nuk tregoi betejën. Askush nuk tregoi vendin. Trupi i tij nuk u gjet kurrë.
Gjithë ky potencial intelektual dhe kjo kompetencë gazetarie që ti ke, o Vudi, dëm me u marrë me këto „zero“-t e shoqërisë sonë. Duke i përmendë ti, ne po ua mësojmë emrat. E bëre t‘famshëm këtë qyrr anonimus, i dhe famë atij „leptirit“ të AAKs, Shpend Gjocajt që tash na e qanë trapin gjithandej, duke mendu se është dikushi. Të lutem mos iu bëj reklamë budallenjve. Shkërmoqi dukuritë e shëmtuara. Emrat mos ja u përmend, lëri le t‘i përpijë harresa.