MCN TV: Xhymshiti denoncon operacionet e fshehta të spiunazhit në Kosovë

Vudi Xhymshiti në MCN TV analizoi zgjedhjen e Nenad Rashiqit, arrestimin për spiunazh të Fatmir Shehollit dhe ndikimin destabilizues të Beogradit e Moskës ndaj Kosovës.

Sot në një lidhje të drejtpërdrejtë nga Londra për emisionin e lajmeve në MCN TV Albania, gazetari dhe analisti i çështjeve politike e të sigurisë,

Vudi Xhymshiti

, komentoi zhvillimet më të fundit politike në Kosovë, përfshirë zgjedhjen e nënkryetarit të Kuvendit nga komuniteti serb, arrestimin e analistit Fatmir Sheholli për spiunazh dhe rreziqet e dezinformimit që, sipas tij, e ekspozojnë Kosovën ndaj ndikimeve të Beogradit dhe Moskës.

Në hapje të intervistës, Xhymshiti e cilësoi votimin e Kuvendit të Kosovës për nënkryetarin Nenad Rashiq si “një akt pragmatizmi institucional” që e çon vendin drejt funksionalizimit të plotë parlamentar dhe shmang bllokimet e orkestruara nga Lista Serbe.

“Ky është një hap i qartë që tregon se shumica shqiptare nuk do të delegojë më legjitimitetin e institucioneve te një strukturë që operon politikisht nën dirigjimin e Beogradit,” tha Xhymshiti, duke iu referuar rezultatit të votimit me 71 vota pro, 9 kundër dhe 24 abstenime.

Ai shpjegoi se tre kandidaturat e mëparshme të Listës Serbe si Sllavko Simiq, Branisllav Nikoliq dhe Liljana Stefanoviq, përfaqësonin “profilin ekstrem të vijës politike të Beogradit”, dhe refuzimi i tyre nga Kuvendi i Kosovës ishte “një sinjal i qartë institucional kundër bllokadës politike”.

Xhymshiti argumentoi se përpjekjet e Listës Serbe për ta mbajtur peng funksionimin e institucioneve kosovare janë pjesë e një strategjie të dirigjuar nga Beogradi, që pason nënshkrimin e marrëveshjes së bashkëpunimit politik e ushtarak mes Serbisë dhe Rusisë në vitin 2022¹. Ai kujtoi se “vetë liderët politikë serbë në veri të Kosovës morën armët kundër institucioneve të Prishtinës në shtator të vitit 2023, në përpjekje për aneksim të territorit”.

Në lidhje me arrestimin e analistit Fatmir Sheholli për dyshime të bazuara për spiunazh, Xhymshiti sqaroi se hetimet e Prokurorisë Speciale kanë zbuluar lidhje të mundshme mes Shehollit dhe Milaim Zekës, të cilët dyshohet se kanë përhapur materiale komprometuese dhe të manipuluara me qëllim bllokimi të konstituimit të Kuvendit.

“Fakti që Zeka pranoi publikisht se kishte marrë materiale në USB nga Sheholli², që ky i fundit pretendonte se i kishte marrë nga një burim gjerman, tregon qartë për një operacion të organizuar spiunazhi e dezinformimi,” tha Xhymshiti. “Ky rrjet kishte për qëllim delegjitimimin e Nenad Rashiqit dhe destabilizimin e procesit politik në Kosovë.”

Xhymshiti theksoi se ndërhyrja e institucioneve të sigurisë në Kosovë ka “çliruar një hallkë të rëndësishme të presionit informativ” që synonte sabotimin e procesit parlamentar, duke shtuar se me neutralizimin e këtij kanali “Kuvendi arriti të votojë dhe të mbyllë konstituimin e plotë”.

Në fund të bisedës, kryeredaktori i Kronikave të Barutit paralajmëroi për rrezikun e vazhdueshëm të infiltrimeve propagandistike, të cilat, sipas tij, nuk vijnë vetëm nga Beogradi, por edhe nga doktrina e dezinformimit rus, e njohur si maskirovka³.

“Kosova është jashtëzakonisht e ekspozuar. Në Prishtinë ende vepron një lagje mediash të lidhura me Beogradin, që ushqehen me fonde dhe materiale dezinformuese. Këto platforma, të drejtuara nga figura si Berat Buzhala, nxënësi i Baton Haxhiut Lirim Mehmetaj, përdorin narrativat televizive për ta minuar besimin e qytetarëve në shtetin e tyre,” theksoi ai. “Institucionet e Kosovës duhet të veprojnë menjëherë për t’i neutralizuar këto operacione.”

Intervista e plotë⁴, ku Vudi Xhymshiti shpjegon me detaje ndikimin e Beogradit, mekanizmat e bllokimit institucional dhe luftën e Kosovës kundër rrjeteve të spiunazhit e dezinformimit, mund të ndiqet më vonë në kanalin e tij në YouTube.

---

1. EU candidate Serbia and Russia sign foreign policy agreement — AP.

2. Nga USB te akuzat e fabrikuara: si funksionon aparati mediatik i Milaim Zekës

Publikimet e “Pa Rrotlla”-s nën drejtimin e Milaim Zekës tregojnë manipulim të qëllimshëm, mungesë verifikimi dhe përdorim politik të formës gazetareske për propagandë. — Kronika B Vëzhgimi mbi Median.

3. Maskirovka është një doktrinë ruse e mashtrimit strategjik dhe dezinformimit, e përdorur që nga koha e Bashkimit Sovjetik. Qëllimi i saj është të mashtrojë kundërshtarin, duke e shtyrë të marrë vendime të gabuara përmes informacioneve të rreme, propagandës, fshehjes së qëllimeve reale dhe inskenimit të ngjarjeve.

Në thelb, maskirovka kombinon mjete politike, mediatike dhe ushtarake për të krijuar konfuzion, për të dobësuar besimin publik dhe për të minuar institucionet demokratike të një vendi pa përdorur domosdoshmërisht forcë ushtarake.

4. Dosja e spiunazhit, Xhymshiti: Dje u ndalua dhe Milaim Zeka. Ka dyshime se po shantazhon prokurorin Blerim Isufaj — MCN TV.