Milaim Zeka shpallet fajtor për shmangie nga tatimi
Një gjykatë në Prishtinë e shpalli fajtor Milaim Zekën për shmangie nga tatimi dhe e urdhëroi t’ia kompensojë Administratës Tatimore të Kosovës 81 mijë euro dëm.
Më 20 maj 2026, Gjykata Themelore në Prishtinë, me trup gjykues të kryesuar nga gjyqtarja Edita Çanta, e shpalli fajtor Milaim Zekën për veprën penale “shmangie nga tatimi”, duke i shqiptuar dënim me burgim në kohëzgjatje prej një viti, dënim i cili nuk do të ekzekutohet nëse, gjatë periudhës së verifikimit prej dy vitesh, ai nuk kryen vepër tjetër penale. Gjykata i shqiptoi gjithashtu gjobë prej 3.000 eurosh dhe e obligoi që Administratës Tatimore të Kosovës t’ia kompensojë dëmin prej 81.000 eurosh.”
Sipas vendimit të shpallur në gjykatë, të gjitha obligimet financiare duhet të përmbushen brenda 30 ditësh pas plotfuqishmërisë së aktgjykimit. Ai u detyrua gjithashtu të paguajë 100 euro për shpenzime procedurale dhe 20 euro në Fondin për Kompenzimin e Viktimave të Krimit. Palët kanë të drejtë ankese brenda 30 ditësh.
Sa i përket Ilir Krasniqit dhe Milaim Zekës lidhur me një pikë tjetër të aktakuzës për “shmangie nga tatimi”, gjykata mori aktgjykim refuzues pasi Prokurori i Shtetit ishte tërhequr nga ajo pikë e aktakuzës.
Vendimi i sotëm mbyll, të paktën në shkallë të parë të rigjykimit, një pjesë të një dosjeje që e ka ndjekur Zekën prej vitesh. Çështja nuk lidhej më me të gjithë panoramën fillestare të akuzave të vitit 2018, por me segmentin tatimor, atë që gjykata e riktheu për shqyrtim pas vendimeve të mëhershme.
Në qendër ishte pyetja e ftohtë e shifrave. A kishin qarkulluar para që nuk ishin deklaruar siç kërkon ligji. Ekspertiza financiare gjyqësore, e raportuar1 më herët nga KRONIKAT E BARUTIT dhe e dëgjuar më pas në sallë gjyqi, kishte konstatuar detyrime të papaguara tatimore dhe kontributesh. Në mars, eksperti financiar Blerim Pushkolli tha se biznesi individual i Zekës, “Qendra Mediale Mozaiku i Kosovës”, kishte deklaruar dhe paguar më pak tatim dhe kontribute për periudhën 2016-2017, në shumën 67.609.71 euro. Zeka e kundërshtoi këtë konstatim.
Por gjykata sot vendosi ndryshe.
Historia nisi me një premtim që dukej më i madh se vetë dokumentet. Një firmë e regjistruar në Prishtinë, “ILIR KRASNIQI & MILAIM ZEKA O.P.”, u paraqit si agjenci punësimi për qytetarë që kërkonin punë në Gjermani. Sipas aktakuzës së ngritur më 28 gusht 2018, qytetarëve u ishte paraqitur një mundësi pune jashtë vendit, ndërsa ata paguanin shuma që, sipas raportimeve, shkonin nga qindra deri në mijëra euro.
Firma u regjistrua më 2 qershor 2016 dhe u shua më 6 tetor 2017. Jeta e saj ligjore ishte e shkurtër. Pasojat, jo.
Në janar 2026, KRONIKAT E BARUTIT raportoi2 për një ekspertizë financiare gjyqësore të urdhëruar nga gjykata, të bazuar në të dhëna tatimore, dokumentacion bankar dhe analiza krahasuese të të ardhurave e shpenzimeve. Dokumenti nuk fliste për motive. Fliste për shifra. Për vitet 2012-2017, ekspertiza evidentonte qarkullim financiar prej 304.444.92 eurosh dhe detyrime të papaguara prej 67.609.71 eurosh.
Në mars 2026, kjo shifër doli sërish në gjykatë. Ajo që më parë ishte pjesë e një dokumenti teknik, u bë pjesë e një seance publike. Sot, ajo histori mori formën e një aktgjykimi.
Zeka, figurë e njohur e medias dhe politikës në Kosovë, ka ndërtuar për vite një prani publike të zhurmshme, shpesh të përplasur me institucione, kundërshtarë politikë dhe aktorë mediatikë. Por ky rast nuk u vendos mbi zhurmë. U vendos mbi tatime, fatura, deklarime dhe detyrime.
Gjykata nuk gjykoi sot gjithë jetën publike të Milaim Zekës. Nuk gjykoi as gjithë historinë e skemës së vizave. Ajo vendosi për shmangie nga tatimi. Por në Kosovë, shpesh një vendim i tillë hap më rrugë shumë sesa mbyll. Sepse pas një shifre qëndrojnë qytetarë, firma të shuara, premtime për punë jashtë vendit dhe një pyetje që e ka ndjekur këtë dosje prej fillimit.
Ku shkuan paratë, dhe pse shteti i gjeti jashtë ligjit.
Ndërkohë, më shumë se nëntë orë pas publikimit të aktgjykimit dhe pasi KRONIKAT E BARUTIT e kishte raportuar vendimin bazuar në shpalljen zyrtare në gjykatë, Gjykata Themelore në Prishtinë nxori një aktvendim për korrigjim teknik të pjesës që lidhej me kompensimin e dëmit ndaj Administratës Tatimore të Kosovës. Në vend të shumës prej 81.000 eurosh të shpallur fillimisht në seancë, Milaim Zeka obligohet të paguajë 67.609.71 euro. Gjykata tha3 se bëhej fjalë për një “lëshim teknik” në precizimin e shumës, e cila, sipas aktvendimit, përputhet me ekspertizën financiare dhe rikualifikimin juridik të veprës penale. Pjesa tjetër e aktgjykimit mbetet e pandryshuar.
Pamjet Kallxo.com
Nga skema e vizave te tatimet. Çfarë po thotë tani gjykata për Milaim Zekën?
Në një rigjykim në Prishtinë, ekspertët financiarë thanë se biznesi i Milaim Zekës deklaroi 67,609 euro më pak tatime. Zeka e kundërshton. Çështja përfshin edhe Ilir Krasniqin. — HULUMTIME
Dosja financiare e Milaim Zekës
Vetëm gjatë viteve 2012–2017, në qarkullimin financiar të Milaim Zekës figurojnë € 304.444,92 euro, shifra që sfidojnë realitetin ekonomik të gazetarisë në Kosovë. Kush po e financon Zekën? — HULUMTIME
Gjykata korrigjon aktgjykimin ndaj Milaim Zekës sa i përket kompensimit të dëmit, në vend të shumës 81 mijë euro obligohet t’i paguajë mbi 67 mijë — Betimi Për Drejtësi