Mysafiri që e përdhosi historinë
Prania e Baton Haxhiut në konakun e familjes Haradinaj, është fyerje për dëshmorët. Një komb që e fton hijen e Stanishiqit në dasmë, e ka humbur busullën etike.
Këto ditë, megjithëse kam qenë shumë i zënë me punën tonë në gazetën tjetër digjitale investigative në Londër, algoritmi i Facebookut, i mbushur me emra që kërkohen në Kosovë, më solli më shpesh sesa do të doja pamje nga dasma e familjes Haradinaj. Me gjithë respektin për gëzimin familjar, për atë çast të shenjtë që familjet shqiptare e kanë kur e martojnë djalin, unë nuk kam ndonjë interes të veçantë për ngjarje të tilla. Por njëra nga videot që më doli përpara, ku shiheshin mysafirët duke hyrë në vendin e dasmës së nipit të ish kryeministrit Ramush Haradinaj, Luan Haradinaj, më tmerroi1. Jo për madhështinë e ceremonisë. Jo për protokollin. Jo për ndonjë emër të politikës. Më tmerroi kur e pashë një fytyrë. Një njeri që, për ata që e njohin historinë e Kosovës, nuk është thjesht i diskutueshëm. Ai është Baton Haxhiu.
