Narrativa e rreme e Hykmete Bajramit
Deklarata e Hykmete Bajramit shtrembëron faktet: rritjet vijnë nga importet dhe keqmenaxhimi historik, jo nga qeveria. Hetimet fokusohen te tregtarët privatë, jo kabineti Kurti.
Më 25 tetor 2025, Hykmete Bajrami, deputete e Lidhjes Demokratike të Kosovës, publikoi në Facebook1 një deklaratë që përpiqet ta shesë si zbulim të vonuar të “së vërtetës”. Në retorikën e saj të zakonshme, ajo shpalli se rritja e çmimeve të energjisë elektrike dhe valët inflacioniste janë “dhuratë e politikave të Kurtit”. Madje deklaroi, me një nënkuptim teatral, se “çështja e energjisë po hetohet nga Prokuroria Speciale”, duke lënë të kuptohet se është dëshmitare në një hetim për “mafi energjetike”. Por çdo fjali e kësaj deklarate është një përpjekje për të kthyer realitetin përmbys, një teatër i gënjeshtrës politike që kërkon ta fshehë përgjegjësinë e vet të kahershme.
Në fakt, rritjet e çmimeve nuk janë produkt i ndonjë politike të vetme të qeverisë Kurti, por pasojë e koktejve të hershme të keqmenaxhimit, privatizimit të papërgjegjshëm dhe sabotimeve institucionale që lidhin emrin e LDK-së me çdo plagë të kësaj industrie. Zyra e Rregullatorit për Energji (ZRrE), e cila është institucion i pavarur dhe mbiqyrëse e tregut, e ka arsyetuar rritjen e çmimeve mbi bazë të kostove të importit dhe luhatjeve globale2, një vendim teknik, jo politik. Po kjo zyrë, në fillim të vitit 2025, kishte paralajmëruar se energjia e importuar mbulon tashmë më shumë se 80 për qind të konsumit kombëtar, një trashëgimi e varësisë që LDK vetë e ushqeu me kontrata importi dhe mosinvestime afatgjata.
Për më tepër, pretendimi i Bajramit3 se “Prokuroria Speciale po heton çështjen e energjisë” është një gjysmë e vërtetë, pra një gënjeshtër me këmishë zyre. Hetimi i përmendur nuk ka objekt Qeverinë, por manipulimet e kompanive private në tregun ndërkufitar të energjisë, skema që përfshijnë EFT Group dhe NOA Energy Trade, kompani të lidhura me biznesmenë që për dekada janë favorizuar nga po ajo elitë politike që Bajrami e përfaqëson. Edhe ankesat që LDK i ka dërguar në organet evropiane energjetike nuk e akuzojnë qeverinë, por tregtarët e energjisë që mbyllën kapacitetet për të rrudhur furnizimin dhe rritur çmimet. Kjo është rrjeta ku ndodhet plaçka e vërtetë, dhe aty është heshtja e vet Bajramit më domethënëse se çdo fjalë e saj publike.
Edhe më ironike është se kur Qeveria ndërmori hapin për të vendosur çmime tavan mbi produktet esenciale një masë mbrojtëse që synonte të pengonte abuzimet tregtare në periudha krize, ishte pikërisht LDK, me Bajramin ndër nënshkruesit, që e dërgoi ligjin në Gjykatën Kushtetuese4. Projektligji për “Masat e Përkohshme të Produkteve Themelore në Raste të Destabilizimit në Treg”, i miratuar më 8 nëntor, u kundërshtua me arsyetime kinse juridike, edhe pse Ministria e Industrisë dhe Zyra Ligjore e Kryeministrit e kishin vlerësuar si plotësisht në harmoni me Kushtetutën. Me këtë akt, LDK jo vetëm që bllokoi një mjet mbrojtës për konsumatorin, por u pozicionua hapur në anën e oligarkëve të tregut që duan të diktojnë çmimet e bukës dhe vajit. Hykmete Bajrami, që sot flet për “varfërimin e qytetarëve”, atëherë ngriti zërin për t’u siguruar që ata të paguajnë më shumë – një avokate e pastruar e shtrenjtimit, që e quan sabotimin “kujdes ligjor”.
Në maj 2025, e paralajmërova pikërisht këtë manovër5, që përmes krizës artificiale, opozita do të sajonte një narrativë për ta bërë qeverinë fajtore për një krizë që e ka origjinën tek bizneset e afërta me të njëjtin establishment. E quajta atëherë “Teatri i Kriminelëve me Kravata”, sepse shfaqjet e tyre në publik kishin më shumë recitim se realitet.
Dhe ja ku jemi sërish: zonja Bajrami, një aktore e lodhur e këtij teatri, rikthehet me një tekst të vjetër, duke shpallur “zbulime” që janë, në fakt, pasqyrime të fajeve që kërkon t’i fshehë.
Faktet flasin: çmimet e energjisë janë rritur më së shumti pas vitit 2021, kur filloi kriza evropiane e furnizimit, tarifa e ZRrE-së në prill 2025 u rrit vetëm 16.1 për qind për t’iu përshtatur importit, jo për t’i mbushur arkat e qeverisë. Asnjë vendim ekzekutiv nuk ka ndikuar në këtë mekanizëm, përkundrazi, subvencionimet e qeverisë Kurti kanë qenë të vetmet që i kanë lehtësuar faturat e mijëra familjeve. Por Bajrami hesht për këtë, sepse në skenarin e saj, e vërteta nuk shitet dot. Ajo kërkon shpejt pushim mes akteve, mbështetur nga një media që ushqehet nga të njëjtat burime që frynë çmimet e tregut.
Në fund, kjo s’është një çështje energjie, por morali. Kur një deputete që dikur menaxhonte financat publike shndërrohet në zëdhënëse të strukturave që shkaktuan rrënimin ekonomik, ajo nuk pasqyron revoltën e qytetarëve, ajo reciton për t’i hutuar ata. E vërteta është më e thjeshtë: në Kosovën e sotme, nuk është qeveria ajo që po varfëron familjet, por rrjetet që e sabotuan shtetin dhe tani përpiqen të kthejnë fajin në qeveri. E kjo, siç e shkrova që në maj, është mizori e organizuar nga kriminelët me kravata. Dhe fytyra e tyre sot ka zë. Quhet Hykmete Bajrami.
Teatri i Kriminelëve me Kravata
Ka një mizori të çuditshme në faktin që të kërkohet të paguash më shumë për më pak. Në Kosovë, kjo mizori ka filluar të përkufizoj jetën e përditshme të qytetarëve, atyre që në përballje me një paqëndrueshmëri ekonomike, gjenden në mëshirën e duarve të dukshme dhe të padukshme që shtrëngojnë lakun e inflacionit përreth qafave të tyre. Këtë muaj, qytetar…
Hykmete Bajrami, Reagim në Facebook, 25 Tetor, 2025.
A do të rritet sërish çmimi i energjisë elektrike? — Ekonomia Online.
LDK kërkon hetim nga Prokuroria Speciale për dyshimet mbi shkeljet në tregun e energjisë — Telegrafi.
Projektligji për çmimet tavan që LDK e dërgoi në kushtetuese, Ministria: Është në harmoni me Kushtetutën — IndeksOnline.
Teatri i Kriminelëve me Kravata
Buka kushton më shumë se e vërteta. Dhe dinjiteti, më pak se një makiato. Kjo nuk është ekonomi, është mizori e organizuar nga kriminelët me kravata. — Kronika B Kritikë.