Nga 7 prilli, gjithçka ndryshon
Pas tre vitesh financimi personal, Kronikat e Barutit kalojnë në abonim. Pa 2,000 abonentë brenda pak muajsh, rrezikohet mbyllja e redaksisë shqipe.
Të dashur lexues,
Prej tre vitesh kjo platformë është mbajtur kryesisht nga financimi im personal, me mbështetje të kufizuar nga disa donacione dhe rreth 130+ abonentë me pagesë, për të cilët jam thellësisht mirënjohës.
Megjithatë, kostot reale të gazetarisë hulumtuese janë të larta. Vetëm një hulumtim i vetëm mund të tejkalojë shumën £100,000, siç ishte rasti i punës mbi Gabriel Escobar. Këto janë shpenzime që nuk mund të përballohen më individualisht.
Për këtë arsye, duke filluar nga 7 prilli, të gjitha materialet e Kronikave të Barutit në gjuhën shqipe do të jenë të qasshme vetëm për abonentët me pagesë.
Ky është një hap i domosdoshëm për ta mbajtur gazetarinë të pavarur dhe të pakapur nga interesa të jashtme.
Nëse brenda disa muajve të ardhshëm nuk arrihet një bazë prej të paktën 2,000 abonentësh me pagesë, do të detyrohem ta reduktoj dhe më pas mbase edhe ta mbyll tërësisht redaksinë në gjuhën shqipe.
Ky nuk është një vendim i lehtë, por është një realitet i pashmangshëm.
Nëse besoni në këtë punë dhe në rëndësinë e një media të pavarur për shoqërinë tonë, mbështetja juaj tani është vendimtare.
Faleminderit për besimin dhe mbështetjen tuaj.
Me respekt!
Vudi Xhymshiti
Themelues i The Frontline Media Group, botues i gazetave digjitale KRONIKAT E BARUTIT dhe Gunpowder Chronicles.
