Presidenca e Kanaleve të Fshehta

Intervista e Vjosa Osmanit nuk e qartësoi krizën. Ajo e thelloi dyshimin mbi motivin, kushtetutshmërinë dhe kufirin mes presidencës dhe mbijetesës politike.

Në Kosovë, ku shteti ende ecën mbi nerva të hapur historikë, fjalët e krerëve institucionalë nuk mund të maten vetëm me peshën e momentit politik. Ato maten me pasojën që lënë mbi rendin kushtetues, mbi besimin publik dhe mbi vetë sigurinë e shtetit. Kjo është arsyeja pse intervista e Presidentes Vjosa Osmani në “Çim Peka Live”¹ nuk mund të trajtohet si një epizod i zakonshëm televiziv. Nuk ishte. Ishte një përpjekje e drejtpërdrejtë për ta rimarrë kontrollin e rrëfimit, për ta rishkruar qendrën e krizës dhe për ta paraqitur vetveten jo thjesht si pjesëmarrëse në përplasjen e tanishme politike, por si mishërim të vetë interesit shtetëror.