Top Channel dhe Dështimi për të Kërkuar Prova
Zeka shpiku publikisht një akuzë të rreme për komplot vrasjeje, një çështje që ne po përpiqeshim ta verifikonim, pasi vetë ai dyshohet për përfshirje. Kur i kërkuam prova, na u përgjigj me fyerje.
Më 28 maj 2025, gjatë një emisioni të drejtpërdrejtë në Televizionin Dukagjini, figura publike dhe ish-deputeti Milaim Zeka bëri një deklaratë të bujshme:
“Shefit t'Kryqit Kuq, Finlandezit, i ke thanë po dojnë me t'vra Shërbimi Sekret i Kosovës. Edhe ai t'ka vet t'ka thanë kush ta ka dhënë këtë informacion, ke thanë Milaim Zeka.”
Më pak se një javë më vonë, më 2 qershor 2025, duke folur në emisionin Shqipëria Live në Top Channel1, Zeka e përsëriti dhe e zgjeroi pretendimin:
“Po ju jap një hollësi. Ky gazetari, që është në rrjetin e BIA-s serbe dhe jeton në Londër, do t’jua them me emër, i ka thënë ish-shefit të Kryqit të Kuq gjatë luftës në Kukës, një finlandezi të quajtur Christian Wiik, që Shërbimi Sekret i Kosovës do të të vrasë. Dhe kur u pyet kush ia dha këtë informacion, ai i ka thanë: Milaim Zeka.”
Këto deklarata janë të pavërteta. Por ato nxjerrin në dritë një situatë më të thellë.
Si erdhi deri këtu?
Në prill të vitit 2025, ekipi ynë kontaktoi për herë të parë z. Christoffer Wiik, duke kërkuar një intervistë për të verifikuar disa pretendime të ndjeshme. Wiik nuk u përgjigj dhe më pas na bllokoi në Facebook.
Pas deklaratës së rreme të Zekës në televizion, ne kontrolluam përsëri dhe konfirmuam se Wiik na kishte bllokuar.
Më 29 maj 2025, i dërguam Zekës një email zyrtar, duke kërkuar sqarim për deklaratat e tij publike.
Për muaj me radhë, ekipi i The Gunpowder Chronicles kishte hulumtuar aktivitetet e Zekës2, pasi ishte zbuluar se bashkëpunëtori i tij, Halit Sahitaj i lidhur, sipas dyshimeve, me inteligjencën ruse, kishte tentuar të më korruptonte me një dokument të fabrikuar3 kundër ish-diplomatit amerikan Richard Grenell.
Hulumtimi ynë më tej zbuloi lidhje të shumta mes Sahitajt, Zekës dhe rrjeteve të dezinformimit që synojnë diskreditimin e Dhomave të Specializuara të Kosovës dhe të Tribunalit për Krime Lufte. Një raport i një ish-hetuesi të DEA-s amerikane, John F. Moynihan, mbështet disa nga këto zbulime4.
Gjatë hulumtimeve, dy burime ndërkombëtare na informuan për një pretendim serioz: se Zeka gjatë periudhës 1998/’99 mund të ishte i përfshirë në një komplot për ta vrarë z. Christoffer Wiik, humanist finlandez që kishte vepruar në kufirin Kosovë-Shqipëri gjatë luftës.
Duke ndjekur standardet etike të gazetarisë, ne kërkuam verifikim të drejtpërdrejtë përpara se të mendonim publikimin e informacionit.
Përpjekjet për të kontaktuar z. Wiik
Më 12 prill 2025, i shkruajta z. Wiik përmes rrjeteve sociale:
I nderuar z. Wiik,
Jam Vudi Xhymshiti, gazetar investigativ nga Kosova, aktualisht në Londër. Shpresoj që ky mesazh t’ju gjejë mirë. Do të vlerësoja shumë mundësinë për të biseduar me ju për vizitën tuaj në Kosovë gjatë luftës. Nga sa kam kuptuar, keni qenë aty si personel humanitar dhe gjithashtu në kapacitet gazetaresk.
Nëse jeni i hapur, do të isha mirënjohës për një bisedë në një kohë të përshtatshme për ju.
Me respekt,
Vudi Xhymshiti
www.thegpc.uk
Wiik e pranoi kërkesën për miqësi, e lexoi mesazhin, por nuk u përgjigj. Më vonë na bllokoi në Facebook.
Nga kujdesi profesional, ne vendosëm të mos e përballnim Zekën me këtë pretendim, dhe nuk e publikuam, duke pritur konfirmim nga Wiik.
Vazhduam hulumtimet mbi aktivitetet e tjera të Zekës, duke përfshirë manipulimin e dëshmitarëve, prodhimin e materialeve të rreme, dhe përpjekjet për të shtrembëruar narrativën publike në Kosovë dhe jashtë saj.
Për të përshkruar qartë ngjarjet: në prill 2025, e kontaktuam z. Wiik përmes Facebook-ut me një kërkesë për intervistë mbi përvojën e tij gjatë luftës në Kosovë. Ai e lexoi mesazhin por nuk u përgjigj dhe më pas na bllokoi.
Ne nuk e kontaktuam Zekën lidhur me këtë pretendim. Por, pas deklaratave të tij të rreme në Debat Plus, e kontrolluam përsëri dhe konfirmuam bllokimin. Më 29 maj, i dërguam Zekës një email zyrtar duke kërkuar sqarim. Një ditë më vonë, morëm një përgjigje fyese: “Forte lopë je, mut i madh je.”
Pozicioni ynë: Pse pretendimi i Zekës është i pamundur
Është e pamundur që Zeka të kishte dijeni për përmbajtjen e kontaktit tonë me Wiik. Mesazhi ynë nuk përmbante asnjë përmendje për ndonjë komplot vrasjeje ose akuzë të ndjeshme. Ishte një kërkesë neutrale dhe profesionale për intervistë mbi përvojën e tij gjatë luftës, që sigurisht kishte për qëllim të verifikonte pretendimet e burimeve tona ndërkombëtare të mireinformuara.
Edhe nëse Wiik, hipotetikisht, ishte komprometuar nga Zeka, ai nuk mund ta dinte qëllimin tonë, pasi nuk i kishim treguar.
Prandaj, pretendimi i Zekës se ne i kemi thënë Wiik-ut që Shërbimi Sekret i Kosovës dëshiron ta vrasë, është një trillim i pastër. Në fakt, ne synonim ta pyesnim nëse ai mund të konfirmonte vërtetësinë e pretendimeve të burimeve tona, sipas të cilave ai vetë kishte qenë shënjestër e një komploti për vrasje të organizuar nga vetë Zeka.
Gjithashtu, është tregues fakti që vetë Zeka, duke e përmendur publikisht këtë temë, konfirmon se kishte dijeni për linjën tonë të hetimit. Burimet tona sugjerojnë se vetë Zeka ishte pas këtij komploti, dhe deklarata e tij publike është një përpjekje për të zhvendosur përgjegjësinë.
Një model mashtrimi
Hetimi i gjerë mbi aktivitetet e Zekës tregon se ky nuk është një rast i izoluar.
Gjatë vitit të fundit kemi dokumentuar:
Krijimin e materialeve të rreme komprometuese dhe dëshmive të fabrikuara për të diskredituar Zyrën e Prokurorit të Specializuar;
Manipulimin e narrativave mediatike për të mbrojtur veten dhe rrjetin e bashkëpunëtorëve;
Tentativat për shantazh ndaj figurave publike si Behgjet Pacolli;
Shitjen e pamjeve të luftës mediave shtetërore serbe për propagandë kundër UÇK-së;
Përdorimin e platformave mediatike për qëllime personale dhe gjeopolitike.
Pse ka rëndësi
Tentativa e Zekës për të ndryshuar narrativën përmes një gënjeshtre, duke na akuzuar ne se i kemi thënë diçka Wiik-ut, nuk është thjesht një incident i rastësishëm. Ajo përbën provë të qartë se kush është Zeka dhe, në rastin më të mirë, shërben si shembull i plotë i mënyrës së veprimit të tij. Me këto deklarata, pa vetëdije, ai e ka zbuluar dhe në një farë mënyre e ka konfirmuar atë që gjetjet tona hulumtuese tregojnë: një manipulues i qëllimshëm i informacionit.
Kjo gjithashtu tregon se Zeka, nën trysninë dhe frikën se po zbulohet si organizator i komplotit për vrasjen e Wiik-ut, ka hedhur një gënjeshtër të madhe në publik, duke më akuzuar mua rrejshëm se paskam thënë Wiik-ut që Shërbimi Sekret i Kosovës dëshiron ta vrasë. Kjo është një gënjeshtër.
Ne nuk e kemi bërë publike këtë linjë hulumtimi. Nuk e kemi përmendur përtej një kërkese të zakonshme për intervistë. Nuk e kemi përballur Zekën me këtë pretendim.
Duke e përmendur vetë publikisht, dy herë, Zeka zbulon njohurinë e tij për hulumtimin tonë dhe gatishmërinë për të shtrembëruar faktet për ta mbrojtur veten.
Ky episod thekson rrezikun që përfaqëson Zeka në peizazhin mediatik dhe politik të Kosovës, një aktor që përdor informacionin si armë, komprometon burime dhe helmon diskursin publik, duke u paraqitur si zëri i së vërtetës.
Në The Gunpowder Chronicles, mbetemi të përkushtuar ndaj raportimit të kujdesshëm dhe etik. Do të vazhdojmë të hetojmë dhe të ekspozojmë ata që përpiqen të manipulojnë të vërtetën për përfitime personale ose politike.
Në këtë kontekst, është e domosdoshme të theksojmë edhe dështimin e Top Channel për të respektuar standardet profesionale dhe Kodin e Etikës së gazetarisë. Gjatë transmetimit të deklaratave të rënda të Milaim Zekës, gazetarët dhe moderatorët e emisionit nuk e vënë aspak në presion për të paraqitur prova konkrete për pretendimet e tij. Sikur ta kishin bërë këtë, do të kishin zbuluar se Zeka nuk ka asnjë fakt që të mbështesë ato që pretendon publikisht. Ne vetë, kur e kemi kontaktuar dhe i kemi kërkuar të paraqesë prova, ai ka refuzuar të përgjigjet. Kur i kemi dërguar email-e zyrtare duke i kërkuar sqarime dhe evidencë, reagimi i tij ka qenë të na fyejë me gjuhë vulgare. Deri më sot, Zeka nuk ka paraqitur asnjë provë për asnjë nga pretendimet që ka bërë. Kjo sjellje jo vetëm që i diskrediton deklaratat e tij, por ngre shqetësime serioze për mënyrën se si media të mëdha si Top Channel po lejojnë hapësirë për përhapjen e dezinformatave, pa bërë verifikimin bazik të fakteve, një detyrim themelor i gazetarisë së përgjegjshme.
BOMBA/ “Të arrestohet Milaim Zeka” rrëfimi: Para 1 jave më kërcënuan, kam përgjime! — Top Channel.
BOMBA/ “Të arrestohet Milaim Zeka” rrëfimi: Para 1 jave më kërcënuan, kam përgjime! — Top Channel.
Një Gazetar, një Ndërmjetës dhe një Mjeshtër i Manipulimit
Milaim Zeka: dezinformues i lidhur me krimin dhe shërbimet ruse, që paguhet për të shtrembëruar narrativën e Kosovës për të goditur Tribunalin Kosovar të drejtësisë në Hagë. — SPOTLIGHT / The GPC I Unit.
Brenda Komplotit për Shkatërrimin e Gjykatës Speciale
Si më ofroi një person me nofkën 'Laky Laky' 5,000 euro për të botuar një tregim të rremë për Richard Grenell, duke e demaskuar një rrjet të madh të dezinformimit kundër drejtësisë në Kosovë. — SPOTLIGHT / The GPC I Unit.