Burime të afërta me ish strukturat e SHIK-ut i thanë Kronikave të Barutit se bllokimi i marrëveshjes për presidentin nuk është rebelim spontan brenda LDK-së, por pjesë e një infrastrukture të vjetër ndikimi. Zhvillimet e 1 shtatorit përputhen në disa pika me paralajmërimet që redaksia i kishte marrë më herët. Por pretendimi më i rëndë, se votat e deputetëve kontrollohen nga kjo strukturë, ende kërkon prova të mëtejshme.
Marrëveshja ndërmjet Albin Kurtit dhe Lumir Abdixhikut për ta propozuar juristin Bekim Sejdiu si kandidat konsensual për president dukej, më 31 gusht, si rruga e parë serioze për ta nxjerrë Kosovën nga një krizë institucionale që ka prodhuar tri palë zgjedhje brenda 18 muajve. Vetë marrëveshja ishte rezultat i negociatave të gjata dhe, sipas raportimeve publike, do të mund ta afronte vendin me krijimin e institucioneve funksionale1.
Vetëm një ditë më vonë, ajo marrëveshje u godit nga brenda LDK-së.
Avdullah Hoti, Hykmete Bajrami, Arben Gashi, Armend Zemaj, Kujtim Shala dhe Janina Ymeri deklaruan se nuk do ta mbështesnin Sejdiun. Abdixhiku paralajmëroi se qëndrimi i tyre e rrezikonte marrëveshjen dhe mund ta çonte Kosovën përsëri në zgjedhje2.
Në sipërfaqe, kjo është një përçarje politike brenda një partie.
Informacioni që KRONIKAT E BARUTIT e ka marrë nga dy rrjete të ndara burimore ngre një pyetje më të rëndë.
A është kjo vetëm përçarje e LDK-së, apo po e shohim efektin e një infrastrukture të vjetër të ndikimit politik që ka mbijetuar shumë më gjatë se vetë organizatat që e krijuan atë.
Përgjigjja, në këtë fazë, nuk mund të jepet si fakt i përfunduar. Por ajo që mund të bëhet është vendosja para publikut e asaj që burimet kanë thënë, asaj që ka ndodhur pas paralajmërimeve të tyre dhe asaj që ende nuk është provuar.
Paralajmërimi që erdhi para rebelimit
Këtë javë, burime të besueshme të Kronikave të Barutit me lidhje të drejtpërdrejta brenda rrethit të ish strukturave të SHIK-ut i thanë redaksisë se ekziston një përplasje e brendshme ndërmjet njerëzve të këtij rrethi dhe Elmi Reçicës.
Sipas tyre, pikërisht kjo përplasje ishte një nga arsyet pse vendosën të flisnin.
Burimet thanë se nuk prisnin që presidenti i Kosovës të zgjidhej. Ata pretenduan se një numër deputetësh të LDK-së janë politikisht ose personalisht të komprometuar dhe se një pjesë e mekanizmit të ndikimit mbi ta kalon, sipas tyre, përmes një rrjeti të lidhur me Reçicën.
Pretendimi qendror ishte konkret.
Sipas këtyre burimeve, struktura nuk kishte interes që deputetët përkatës t’ia jepnin votat një marrëveshjeje Kurti dhe Abdixhiku që do ta zgjidhte krizën institucionale.
Burimet shkuan më tej. Ata e përshkruan vetë krizën si të prodhuar dhe të mirëmbajtur nga infrastruktura politike e ish SHIK-ut dhe pretenduan se ndikimi i këtij rrethi shtrihet thellë në PDK dhe AAK.
Ky është pretendim burimor dhe jo fakt që KRONIKAT E BARUTIT mund ta deklarojë sot si të provuar në tërësinë e tij.
Nuk kemi dokument që e demonstron se PDK ose AAK komandohen nga një qendër e vetme. Nuk kemi komunikim të konfirmuar që u jep gjashtë deputetëve urdhër se si të votojnë. Dhe ngjashmëria e interesave politike nuk është provë e koordinimit operacional.
Por burimet dhanë edhe parashikime konkrete, të cilat mund të testohen me zhvillimet që vijnë.
Ata thanë se Kosova sipas gjasës do të përfundonte në zgjedhje të tjera dhe pretenduan se, në një skenar të tillë, Gazmend Muhaxheri i LDK-së në Pejë dhe Imri Ahmeti i LDK-së në Lipjan mund të largohen nga LDK-ja dhe të afrohen me AAK-në e Ramush Haradinajt.
Sipas tyre, nëse kjo ndodh, nuk duhet parë si lëvizje spontane paszgjedhore, por si pjesë e një procesi më të gjatë për dobësimin e LDK-së nga brenda.
As Muhaxheri dhe as Ahmeti nuk e kanë njoftuar publikisht një kalim të tillë.
Prandaj kjo pjesë mbetet parashikim i burimeve, jo fakt.
Pyetjet që Muhaxheri nuk iu përgjigj
Pikërisht sepse pretendimi ishte serioz, Kronikat e Barutit i shkroi Gazmend Muhaxherit në mëngjesin e 1 shtatorit3.
Redaksia e informoi atë se burime që e përshkruanin veten si të afërta me ish strukturat e SHIK-ut pretendonin se ai nuk do ta mbështeste kandidatin e dakorduar për president, se mund të ndikonte tek deputetë të tjerë të LDK-së dhe se kjo lidhej, sipas tyre, me një rreth të afërt me Elmi Reçicën.
Muhaxherit iu paraqit edhe pretendimi se, pas zgjedhjeve të mundshme, ai dhe disa kolegë mund të kalonin drejt AAK-së.
Atij iu kërkua qartë t’i mohonte ose t’i konfirmonte pretendimet.
Muhaxheri nuk u përgjigj.
Në mbrëmje, ai publikoi një status që nuk adresonte pretendimet për SHIK-un ose AAK-në, por i mbështeste pikërisht deputetët e degës së Pejës që kishin dalë kundër marrëveshjes.
“Mbështes fuqishëm qëndrimin e deputetëve të LDK-së nga dega e Pejës. Sot morën vendimin e duhur për Kosovën dhe për LDK-në”, shkroi ai4.
Redaksia i shkroi përsëri dhe e pyeti nëse statusi duhej kuptuar si konfirmim i asaj për të cilën e kishim pyetur më herët.
Ai nuk iu përgjigj as kësaj pyetjeje.
Statusi i Muhaxherit nuk provon se burimet kishin të drejtë për mekanizmin që pretendojnë. Por ai konfirmoi një element të parashikimit të tyre, pozicionimin politik të Muhaxherit në mbështetje të rebelimit brenda LDK-së.
Kjo është arsyeja pse informacioni burimor tani kërkon shqyrtim më serioz.
Një burim tjetër dhe historia e LDK-së
Një burim i dytë, i ndarë nga rrjeti i parë dhe i afërt me rrethe të vjetra të LDK-së që vazhdojnë ta identifikojnë veten me trashëgiminë politike të Ibrahim Rugovës, i dha redaksisë një interpretim tjetër të së njëjtës përçarje.
Sipas tij, disa nga figurat që sot përplasen me Abdixhikun nuk duhet kuptuar vetëm përmes LDK-së së sotme, por përmes përçarjeve politike që filluan pas luftës dhe rrethit të Bujar Bukoshit.
Burimi e lidhi këtë histori me Partinë e Re të Kosovës, PReK.
Sipas burimit, një pjesë e këtij grupimi e ka origjinën politike te rrethi i Bujar Bukoshit dhe te PReK-u, Partia e Re e Kosovës, e krijuar pas luftës në përplasje me LDK-në e Ibrahim Rugovës. Burimi thotë se krijimi dhe funksioni politik i kësaj strukture duhet parë edhe në raport me Hashim Thaçin dhe interesin e atëhershëm të PDK-së për dobësimin e Rugovës nga brenda elektoratit tradicional të LDK-së. Dokumentacioni publik e regjistron Bujar Bukoshin si themelues formal të PReK-ut. Pretendimi i burimit është më i gjerë dhe lidhet me prapavijën politike dhe marrëdhëniet që, sipas tij, qëndronin pas projektit, jo me autorësinë formale të dokumenteve të themelimit5.
Burimi e vendos Hykmete Bajramin, Abdullah Hotin dhe Arben Gashin brenda këtij rrjeti politik të ndikimit, ndërsa për figura të tjera të gjashtëshes përshkruan mekanizma të ndryshëm përmes të cilëve, sipas tij, strukturat e lidhura me ish SHIK-un kanë krijuar ose ruajtur ndikim.
Këtu hyn edhe pretendimi më senzitiv i dhënë redaksisë.
Kujtim Shala dhe pretendimi për kompromat
Për Kujtim Shalën, burimi i besueshëm i Kronikave të Barutit thotë se struktura të lidhura me ish SHIK-un posedojnë prej vitesh material privat komprometues ndaj tij. Sipas burimit, ekziston një regjistrim intim ku shfaqet një person që burimi e identifikon si Shala së bashku me një figurë të lartë të PDK-së. KRONIKAT E BARUTIT nuk po e identifikon personin tjetër dhe nuk do të publikojë hollësi intime që nuk kanë interes publik.
Redaksia ka parë material të lidhur me këtë pretendim.
Interesi publik nuk qëndron te natyra e marrëdhënies private të personave të përfshirë dhe as te orientimi seksual i askujt. Çështja që po heton redaksia jonë është pretendimi i burimit se materiali është ruajtur dhe përdorur si kompromat politik ndaj Shalës.
Burimi pretendon se regjistrimi është bërë rreth një dekadë më parë dhe e lidh posedimin e materialit me Adem Grabovcin dhe rrethin politik të ish SHIK-ut. Sipas tij, pikërisht ekzistenca e këtij materiali e ka bërë Shalën të cenueshëm ndaj presionit politik të këtij rrjeti.
Kronikat e Barutit nuk po e paraqet si fakt të pavarur se Shala ka ndryshuar një votë të caktuar si rezultat i këtij materiali. Ajo që redaksia mund të raportojë është se një burim të cilin e konsideron të besueshëm, me njohuri të drejtpërdrejta për këto rrjete, thotë se kompromati ekziston dhe se është pjesë e mekanizmit përmes të cilit ushtrohet ndikim mbi të.
Ky dallim është i rëndësishëm. Nuk e zhvlerëson burimin. Përkundrazi, e bën pretendimin më të fortë rrafshin gazetaresk, sepse i tregon lexuesit saktësisht çfarë dimë nga materiali dhe çfarë na dëshmon burimi.
Shalës i është ofruar mundësia që t’u përgjigjet pyetjeve të redaksisë. KRONIKAT E BARUTIT e ka kërkuar publikisht kontaktin me të pasi nuk kishte arritur të krijonte komunikim të drejtpërdrejtë6. Nëse ai e mohon ekzistencën ose përdorimin e materialit, mohimi i tij duhet të publikohet i plotë dhe pastaj të peshohet kundrejt provave që posedon redaksia jonë.
Pastaj hyn Berat Buzhala
Pikërisht këtu bëhet më interesante ndërhyrja publike e Berat Buzhalës.
Brenda disa orësh nga shpërthimi i përçarjes, Buzhala nuk u pozicionua thjesht kundër marrëveshjes Kurti dhe Abdixhiku. Ai ndërtoi publikisht një narrativë mbrojtëse rreth gjashtë deputetëve.
“330 mijë shqiptarë të Kosovës në zgjedhjet e fundit kanë votu për vizionin dhe për qëndrimet e kësaj gjashtëshe”, shkroi ai7, duke përfunduar me deklaratën “Krejt jemi me ju”.
Për Kujtim Shalën, Buzhala shkoi edhe më larg. E përshkroi atë si “i panënshtruar dhe i panënshtrueshëm” dhe “i pakorruptuar dhe i pakorruptueshëm”, pikërisht në momentin kur burimet e Kronikave të Barutit po i përshkruanin redaksisë një realitet krejt tjetër, një pretendim se Shala është ndër figurat mbi të cilat ekziston kompromat i vjetër.
Kontrasti është gazetareskisht i rëndësishëm.
Kjo nuk provon se Buzhala e di se çfarë materiali mund të ekzistojë ndaj Shalës. Nuk provon as se postimet e tij janë urdhëruar nga SHIK-u. Por tregon se, në momentin kur gjashtë deputetët e LDK-së dolën kundër marrëveshjes, një prej pronarëve më aktivë (dhe më i komprometuar sipas gjetjeve tona hulumtuese si Berat Buzhala) të medias politike në Kosovë filloi t’i paraqiste jo thjesht si kundërshtarë të Abdixhikut, por si mbrojtës të Republikës.
Dhe këtu duhet ta lidhim me hulumtimin e mëparshëm mbi Nacionalen, ngase hulumtimi ynë i gushtit dokumentoi një model editorial8. Zhvillimet e tanishme shtojnë një kapitull të ri që duhet analizuar në kontekstin e atij modeli.
Kosova në bankën e të akuzuarve
A mund të ndikojë një media në mënyrën se si një shtet e sheh vetveten gjatë një krize të sigurisë kombëtare?
Grenell kthehet te i njëjti krah i LDK-së
Më 1 shtator, Grenell publikoi fotografinë e gjashtë deputetëve dhe shkroi në X se Avdullah Hoti ishte miku i tij dhe se Hoti me kolegët ishin “great friends of America”9.
Nacionale e ngriti deklaratën menjëherë si lajm, duke e paraqitur Grenellin si mbështetës të gjashtë deputetëve që e kishin refuzuar marrëveshjen Kurti dhe Abdixhiku10.
Kjo ndërhyrje ka peshë për shkak të historisë.
Grenell nuk është një komentator i jashtëm që po e zbulon Kosovën në vitin 2026.
Në vitin 2020 ai ishte i dërguari i posaçëm i administratës Trump për dialogun Kosovë Serbi.
Gjatë përplasjes së tij me qeverinë e parë Kurti, kërkesa amerikane për heqjen e tarifave ndaj mallrave serbe u kthye në konflikt të hapur politik. Në të njëjtën periudhë u hodh publikisht ideja e largimit të trupave amerikane nga Kosova.
Një studim i porositur nga Parlamenti Evropian për ta identifikuar dezinformimin në Ballkanin Perëndimor shkoi jashtëzakonisht larg në përshkrimin e asaj që ndodhi. Studimi thotë se Grenell “dukshëm e kishte orkestruar” që senatori David Perdue11 dhe Donald Trump Jr12 të sugjeronin tërheqjen e trupave dhe se më pas e përdori kërcënimin në negociatat me partnerët e koalicionit të Kurtit, duke e përshkruar procesin si orkestrim të votës së mosbesimit13.
Ky është formulimi i studimit të porositur nga Parlamenti Evropian, jo konkluzion penal ose gjyqësor ndaj Grenellit.
Një dokument tjetër i Parlamentit Evropian, raporti për Kosovën për vitet 2019 dhe 2020, tha se fundi i qeverisë Kurti ekspozoi “ndërhyrje e papërshtatshme e aktorëve të jashtëm" në punën e Qeverisë dhe Kuvendit14.
Franca dhe Gjermania kishin reaguar në kohë reale.
Më 25 mars 2020, dy qeveritë kërkuan që mocioni i mosbesimit ndaj qeverisë Kurti të rishqyrtohej ose të shtyhej, duke argumentuar se Kosovës i nevojitej një qeveri stabile gjatë pandemisë15.
Grenell e ka kundërshtuar interpretimin se ai e orkestroi rrëzimin e qeverisë.
Por rezultati politik ishte i qartë.
Qeveria Kurti ra në mars. Avdullah Hoti u bë kryeministër më 3 qershor 202016.
Disa muaj më vonë, Hoti u ul në Shtëpinë e Bardhë me Aleksandar Vuçiqin për marrëveshjen ekonomike të ndërmjetësuar nga administrata Trump, ku Grenell ishte ndërmjetësi kryesor amerikan17.
Kjo histori e bën ndërhyrjen e tij të 1 shtatorit 2026 politikisht shumë më domethënëse se një postim i zakonshëm në X.
Ai përsëri po e mbështet pikërisht segmentin e LDK-së që e kundërshton një marrëveshje të arritur nga kryetari i partisë me Albin Kurtin. Kjo nuk provon se Grenell e ka organizuar kundërshtimin. Por paralelizmi historik është real dhe i dokumentueshëm.
Nga Washingtoni te Beogradi
Grenell gjithashtu ka një marrëdhënie të pazakontë publike me udhëheqjen serbe.
Në tetor 2023, Aleksandar Vuçiq i dha atij Urdhrin e Flamurit të Serbisë të shkallës së parë.
Presidenca serbe tha se dekorata iu dha për merita të veçanta në zhvillimin dhe forcimin e bashkëpunimit dhe marrëdhënieve miqësore ndërmjet Serbisë dhe Shteteve të Bashkuara. Vuçiq e quajti Grenellin mik të vërtetë të Serbisë dhe të rajonit18.
Marrja e një dekorate nga Serbia është fakt relevant kur një ish ndërmjetës amerikan ndërhyn përsëri në një konflikt të brendshëm politik në Kosovë dhe e përkufizon njërën palë si “miq të mëdhenj të Amerikës”. Sepse kjo formulë bën më shumë sesa lavdëron Hotin. Ajo e krijon edhe një nëntekst.
Nëse këta janë miqtë e mëdhenj të Amerikës, çfarë janë ata që mbështesin marrëveshjen.
Ky mekanizëm retorik është i njohur në politikën kosovare. KRONIKAT E BARUTIT e ka dokumentuar më parë edhe tek politikat redaksionale të Gazetës Nacionale, ku një debat konkret për politikën shtetërore gradualisht transformohet në test besnikërie ndaj Amerikës.
Sheholli dhe hallka serbe
Burimet e ish SHIK-ut e lidhin një pjesë tjetër të mekanizmit të pretenduar të kompromatit me informacion që, sipas tyre, ka ardhur edhe nga Serbia.
Kjo pjesë kërkon kujdes të jashtëzakonshëm.
Ajo që është tashmë në regjistrin publik është se aktakuza ndaj Fatmir Shehollit e ka sjellë në qendër të hetimeve një zinxhir të pretenduar komunikimi me inteligjencën serbe dhe me Bojan Dimiqin.
Në hulumtimin “Dosja Leptiri dhe konvergjenca e frikshme mes BIA-s dhe politikës së Ramush Haradinajt”, Kronikat e Barutit raportoi se, sipas aktakuzës, në telefonin e Shehollit ishte gjetur dokumenti “Leptiri”, një plan operativ serb për komprometimin dhe përpjekjen për rekrutimin e Albin Kurtit gjatë burgimit të tij në Serbi19.
Dokumenti, sipas aktakuzës së përshkruar në atë hulumtim, iu dërgua Shehollit nga Dimiqi dhe më pas u shpërnda te persona të tjerë.
KRONIKAT E BARUTIT ka dokumentuar gjithashtu se narrativa politike e Ramush Haradinajt, gjatë viteve, ka përfshirë insinuata se Kurti ishte rekrutuar nga Serbia.
Përsëri, përputhja e narrativës nuk provon urdhër operacional. Por tani ekziston një dokument i atribuuar shërbimit serb, një person i akuzuar për spiunazh që e posedonte atë dhe një narrativë politike të ngjashme që qarkullonte në Kosovë.
Kjo është arsyeja pse pyetja për rrugët e kompromatit dhe ndikimit nuk mund të hidhet poshtë si fantazi politike.
Duhet hetuar.
Çfarë dimë dhe çfarë nuk dimë
Deri këtu ekzistojnë disa fakte të forta. Kurti dhe Abdixhiku arritën marrëveshje për Bekim Sejdiun. Gjashtë deputetë të LDK-së e kundërshtuan atë.
Gazmend Muhaxheri i mbështeti publikisht deputetët nga Peja pasi Kronikat e Barutit e kishte pyetur po atë ditë për pretendimet se ai do ta merrte pikërisht këtë pozicion.
Berat Buzhala e nisi një mbështetje të fuqishme publike për gjashtëshen. Nacionale e shumëfishoi mbështetjen e Grenellit. Grenell u pozicionua në anën e Hotit dhe kolegëve të tij. Dhe Grenell ka precedent të dokumentuar të ndërhyrjes së fuqishme në politikën kosovare gjatë krizës që e rrëzoi qeverinë Kurti në vitin 2020.
Këto janë fakte.
Ekziston pastaj niveli i dytë.
Burimet e Kronikave të Barutit pretendojnë se prapa krizës qëndron një infrastrukturë e vjetër e SHIK-ut, se Elmi Reçica mban ndikim mbi një pjesë të deputetëve dhe se kompromati është një nga mjetet e kontrollit.
Këtë nuk mund ta deklarojmë ende si fakt të provuar.
Ekziston edhe niveli i tretë.
Pretendimi se Muhaxheri dhe Imri Ahmeti mund të kalojnë në AAK pas zgjedhjeve të ardhshme është parashikim. Nëse ndodh, do të bëhet zhvillim politik që e kërkon rishqyrtimin e informacionit që burimet na e dhanë para ngjarjes. Nëse nuk ndodh, edhe kjo do të jetë informacion relevant për vlerësimin e saktësisë së tyre.
Gazetaria hulumtuese duhet ta lejojë provën të punojë në të dy drejtimet. Kriza që duhet hetuar, jo mitologjizuar Mund të jetë tundim i madh që gjithë këtë ta përmbledhim në një fjali.
“SHIK-u po e rrëzon marrëveshjen.”
Por sot nuk kemi prova të mjaftueshme për ta shkruar këtë si fakt. Ajo që e kemi është diçka më e saktë dhe, ndoshta, më shqetësuese. Kemi burime të afërta me strukturën që paralajmërojnë paraprakisht se marrëveshja do të sabotohet. Kemi gjashtë deputetë që e sabotojnë atë një ditë më vonë.
Kemi një figurë të rëndësishme të LDK-së në Pejë, për të cilën burimet kishin folur specifikisht, që del publikisht në mbështetje të tyre pasi nuk u përgjigjet pyetjeve tona.
E kemi Berat Buzhalën që i jep rebelimit mbështetje të fortë mediatike dhe personale.
E kemi Richard Grenellin e lidhur me Moskën dhe Beogradin që hyn nga jashtë dhe e legjitimon të njëjtin grup përmes autoritetit të rrejshëm të Amerikës.
Dhe e kemi historinë e vitit 2020 që tregon se kombinimi i përçarjes së brendshme të LDK-së, presionit të jashtëm dhe ndërhyrjes së Grenellit ka prodhuar më parë ndryshim qeverie në Kosovë.
Asnjëra prej këtyre, veçmas ose së bashku, nuk është ende provë për ekzistencën e një komande unike. Por janë mjaftueshëm për një pyetje të fortë demokratike.
Kush po përfiton nga pamundësia e Kosovës për t’i krijuar institucionet e veta. Dhe nëse deputetët po votojnë sipas bindjes së tyre, atëherë përgjigjja është e thjeshtë.
Ata duhet ta thonë këtë dhe t’u përgjigjen pyetjeve.
Nëse ekzistojnë kompromate, presione, urdhra ose marrëdhënie të fshehta që e ndikojnë votën parlamentare, atëherë problemi nuk është më vetëm LDK-ja.
Problemi është integriteti i Republikës.
KRONIKAT E BARUTIT do të vazhdojë t’i kontrollojë këto pretendime kundrejt dokumenteve, komunikimeve dhe zhvillimeve që pasojnë. Sepse kriza mund të jetë politike. Por nëse provohet se vota parlamentare kontrollohet nga rrjete të fshehta dhe kompromatet, atëherë kemi hyrë në territorin e sigurisë kombëtare.
A Dështoi Serbia ta Rekrutonte Kurtin, Pastaj U Përpoq t’ia Vriste Reputacionin?
Po sikur operacioni më i rrezikshëm i Serbisë kundër Kosovës të mos kishte nevojë për tanke, por për politikanë, media, dokumente dhe narrativa që duken krejtësisht vendore?
Nëse ky raportim ka vlerë për ty, ndihmoje të vazhdojë. Kontribuo sot për gazetari të pavarur, të guximshme dhe në shërbim të publikut.
Reuters, “Kosovo parties strike deal to elect president, breaking deadlock”, 31 gusht 2026. Raportimi dokumenton marrëveshjen LVV dhe LDK për Bekim Sejdiun dhe faktin se Kosova kishte kaluar tri zgjedhje në 18 muaj.
KOHA, “Marrëveshja për presidentin në rrezik, 6 deputetë të LDK-së dalin kundër”, 1 shtator 2026. Identifikon Avdullah Hotin, Hykmete Bajramin, Arben Gashin, Janina Ymerin, Armend Zemajn dhe Kujtim Shalën si kundërshtarë të marrëveshjes.
Shkresa jonë dërguar zt Muhaxheri më 1 Shtator, 2026
Postimi publik i Gazmend Muhaxherit, 1 shtator 2026. Muhaxheri shkroi se i mbështeste fuqishëm deputetët e LDK-së nga dega e Pejës.
OSBE, udhëzues për partitë politike në Kosovë. Dokumenti regjistron se Partia e Re e Kosovës u themelua në prill 2002 nga Bujar Bukoshi.
Kosova në bankën e të akuzuarve
Një vit para Banjskës, Gazeta Nacionale e vendosi Kosovën në bankën e të akuzuarve, ndërsa Serbia e lidhur me Moskën mbeti kryesisht në sfondin editorial.
Kosova në bankën e të akuzuarve
A mund të ndikojë një media në mënyrën se si një shtet e sheh vetveten gjatë një krize të sigurisë kombëtare?
Postimi i Richard Grenell në Rrjetin X, më 1 Shtator, 2026.
Nga Diplomacia Globale te Skena e Teatrit
I dëbuar me turp nga Gjermania, i përjashtuar si i pabesueshëm nga inteligjenca amerikane, i nderuar nga Serbia dhe tani i degraduar në një teatër pa ndikim, pa relevancë dhe pa të ardhme.
Nga Diplomacia Globale te Skena e Teatrit
Richard Grenell, dikur një figurë e fuqishme në rrethet e inteligjencës dhe diplomacisë amerikane, ka pësuar një rënie dramatike nga pozitat e larta qeveritare në SHBA dhe Europë në një rol që shënon…
Postimi i Gazetës Nacionale, 1 Shtator, 2026
Grenell në krah të 6 deputetëve të LDK-së që i thanë “jo” marrëveshjes Kurti-Abdixhiku — Nacionale.
Postimi i Senatorit David Perdue në rrjetin X, 10 Mars, 2020.
Postimi i D Trump Jr në rrjetin X, 10 Mars, 2020.
Parlamenti Evropian, “Mapping Fake News and Disinformation in the Western Balkans and Identifying Ways to Effectively Counter Them”, 2020. Studimi përshkruan rolin e Grenellit në presionet që paraprinë mocionin e mosbesimit ndaj qeverisë Kurti.
Mapping Fake News and Disinformation in the Western Balkans and Identifying Ways to Effectively Counter Them — EU Parliament Report.
Parlamenti Evropian, "2019-2020 Reports on Kosovo", raport i Komisionit për Punë të Jashtme, 3 mars 2021. Raporti, në trajtimin e krizës politike të vitit 2020, ngriti shqetësimin për "undue interference of external actors" në funksionimin politik dhe institucional të Kosovës.
https://www.europarl.europa.eu/doceo/document/A-9-2021-0031_EN.html
Federal Foreign Office of Germany, "Joint declaration of the governments of France and Germany on the political situation in Kosovo", 25 mars 2020. Franca dhe Gjermania deklaruan se Kosova kishte nevojë për një qeveri stabile dhe plotësisht funksionale gjatë krizës së COVID-19 dhe kërkuan që mocioni i mosbesimit ndaj Qeverisë Kurti të rishqyrtohej ose të shtyhej.
https://www.auswaertiges-amt.de/en/newsroom/news/2328584-2328584
U.S. Department of State, "2020 Country Reports on Human Rights Practices - Kosovo". Raporti dokumenton krizën politike të vitit 2020, rënien e Qeverisë Kurti dhe ardhjen e Avdullah Hotit në postin e kryeministrit më 3 qershor 2020.
https://2021-2025.state.gov/reports/2020-country-reports-on-human-rights-practices/kosovo
The Washington Post, raportimi mbi marrëveshjen Kosovë-Serbi të ndërmjetësuar nga administrata Trump në Shtëpinë e Bardhë, 4 shtator 2020. Burimi përdoret për kontekstin e rolit të Richard Grenellit në procesin që çoi Avdullah Hotin dhe Aleksandar Vuçiqin në Shtëpinë e Bardhë.
https://www.washingtonpost.com/politics/trump-kosovo-serbia-agreement/2020/09/04/b1283f8c-eec0-11ea-99a1-71343d03bc29_story.html
Presidenca e Republikës së Serbisë, "Uručenje odlikovanja Ričardu Grenelu", 25 tetor 2023. Presidenca serbe dokumenton se Aleksandar Vuçiq i dha Richard Grenellit Urdhrin e Flamurit të Serbisë të shkallës së parë. Vuçiq e përshkroi Grenellin si "mik të vërtetë" të Serbisë dhe rajonit dhe tha se ai kishte luajtur rol kyç në forcimin e lidhjeve ndërmjet Serbisë dhe Shteteve të Bashkuara.
https://www.predsednik.rs/lat/pres-centar/vesti/urucenje-odlikovanja-ricardu-grenelu
Dosja Leptiri dhe konvergjenca e frikshme mes BIA-s dhe politikës së Ramush Haradinajt
Prokuroria gjeti te Sheholli planin e BIA-s për diskreditimin e Kurtit. Haradinaj e zbatoi atë duke e akuzuar kryeministrin për spiunazh. Përputhja e këtyre gjetjeve kërkon hetim të menjëhershëm.
Dosja Leptiri dhe konvergjenca e frikshme mes BIA-s dhe politikës së Ramush Haradinajt
Ky nuk është thjesht një debat i zakonshëm politik në Prishtinë. Është një përplasje ku dokumentet e sekuestruara të inteligjencës serbe e takojnë drejtpërdrejt retorikën e foltores së Kuvendit nga Ramush Haradinaj.