Sheholli–Zeka: zinxhiri i dezinformimit
Një operacion dezinformimi i orkestruar nga BIA, përmes Shehollit e Zekës, synoi të ndikojë konstituimin e Kuvendit të Kosovës me audio të fabrikuara dhe presion.
Ajo që nisi si një varg “ekskluzivesh” të ethshme në një portal periferik u shndërrua shpejt në një rast kundër-inteligjence me pasoja reale për institucionet ende të brishta të Kosovës. Në qendër qëndrojnë dy njerëz: Fatmir Sheholli, një operator politik për të cilin prej vitesh qarkullojnë dyshime për lidhje me shërbimet e fshehta serbe, dhe Milaim Zeka, figurë mediatike impulsive që ka lëvizur mes mitologjisë personale “kryqëzuese” dhe politikës së pistë transaksionale të kompromatit (material i kompromentues, shpesh i sajuar, për shantazh e ndikim). Gjatë dy javëve të fundit, skeleti që e mbante bashkë këtë marrëdhënie u pa qartë, bashkë me të edhe pamja e një operacioni të fabrikuar për media, me të cilin inteligjenca serbe synoi të formësonte politikën kosovare në zemër të konstituimit të Kuvendit.
Më 30 shtator, portali i Zekës “Pa Rrotlla” nisi publikimin e asaj që e paraqiti si “transkripte” audio që implikonin Nenad Rashiqin, atëherë në prag të zgjedhjeve për poztiën e nënkryetarit të Kuvendit nga komuniteti serb, në biseda për “përqindje”, fatura e favore.
“Pa Rrotlla sjell ekskluzivisht… një bisedë që ngre dyshime serioze për korrupsion brenda Qeverisë së Kosovës”,
- njoftoi faqja1, duke hapur një seri të montuar me narracion sugjestiv dhe rreshta të pjesshëm, shpesh të padëgjueshëm.
Portali pohonte, gabimisht, se Rashiq, ishte ministër në qeverinë Kurti. Në fakt, javën pasuese Parlamenti do ta zgjidhte nënkryetar nga komuniteti serb2, një vendim që theu bllokadën tetëmujore3 dhe zemëroi zëdhënësit e Beogradit4. Materialet u hodhën në letër pikërisht teksa përcaktoheshin pozicionet drejtuese të shtetit. Me Listën Serbe në bojkot e kërcënime ankimimesh5, Rashiq kundërshtar i kontrollit të Beogradit mbi politikën e serbëve në Kosovë, u përkrah nga shumica ndërpartiake. Agjencitë ndërkombëtare nënvizuan peshën e votimit6, mediat e rreshtuara me Beogradin shpërthyen, juristët kushtetues polemizuan. Koha e “rrjedhjeve” ishte e përkryer.
Pastaj skena u përmbys. Më 9 tetor, Policia arrestoi Shehollin7 nën dyshimin për spiunazh, në një operacion të udhëhequr nga Prokuroria Speciale, me bastisje në banesë dhe automjetin e tij. Zyrtarët thanë se u ndalua për 48 orë8 në pritje të kërkesës për paraburgim, ministri i Brendshëm e quajti rast prioritar për sigurinë kombëtare9. Të nesërmen, gjykata miratoi masën e paraburgimit10.
Mbrëmjen e asaj dite, televizionet transmetonin pamje ekskluzive nga arrestimi dhe Zeka ishte kudo, në Facebook11, në studio duke këmbëngulur se thjesht po pinte kafe me një burim kur hynë oficerët. Në “Frontal” të T712, ai tha se ishte marrë në pyetje si dëshmitar dhe pranoi se materialet e “Pa Rrotlla”-s i kishin ardhur përmes një USB-je që ia atribuoi Shehollit.
Me fjalët e tij: “Fatmir Sheholli… u arrestua për disa incizime ose një USB që ma dha mua dhe ne i publikuam në Pa Rrotlla.”
Në studio shtoi se kishte rënë dakord t’ia dorëzonte USB-në dhe dokumentet Prokurorisë Speciale pas zgjedhjeve lokale të 12 tetorit. Performanca ishte tipike, Zeka i pezmatuar, teatror dhe i kujdesshëm të paraqitej si gazetar i goditur pse flet të vërteta të hidhura13.
Por deri atëherë, dosja e Prokurorisë, e qarkulluar në disa redaksi, rrëfente një histori krejt tjetër. Sipas saj, Sheholli nuk ishte »sinjalizues« prokurorët pretendojnë se ai vepronte sipas udhëzimeve të një zyrtari të Agjencisë Serbe të Sigurisë dhe Informacionit (BIA), Bojan Dimiq14. Dosja pohon se, më 26 shtator, sipas një plani të Dimiçit, Sheholli udhëtoi në Mitrovicën e Veriut dhe, në parkingun e shkollës teknike, mori një pako, materiale audio dhe transkripte të bisedave të supozuara “kompromentuese” që lidhnin zyrtarë të Ministrisë për Komunitete dhe Kthim15. Dyshohet se mori edhe pagesë në para që këto materiale të publikoheshin »në media online« gjë që ndodhi katër ditë më vonë në “Pa Rrotlla”.
Nëse kjo tablo është e saktë, rrëfimi i Prokurorisë përputhet me atë që u pa publikisht. Ai pasqyron një model që kosovarët e njohin mirë, dezinformim i paketuar për viralitet, i prerë sipas ritmeve të politikës së brendshme, e pastaj i »larë« përmes emisioneve dhe portaleve me aq stil sa të duket gazetari. Predha nuk ishin vetëm narrativat, ishte kaosi reaktiv që prodhuan cikle lajmesh të zëna me skandale duke i vënë deputetët e pakicave në siklet, një proces kushtetues edhe më i polarizuar.
Sjellja e Zekës dhe fjalët e tij, e lidhin atë me logjistikën mediatike të operacionit. Në Klan Kosova16 dhe T7 ai tha se i kishte përgjimet, se bashkë me ekipin i përkthyen dhe i skenarizuan ato, dhe paralajmëroi »pjesë« të tjera, dhe se Prokuroria Speciale kishte “lëvizur” për t’ia marrë materialet. Ai i shiti këto si reporterizëm normal. Dosja sugjeron se ishin produkt zinxhiri i një shërbimi armiqësor. Kjo nuk provon se Zeka vepronte me dije nën një detyrë të huaj, por tregon qartë se portali i tij shërbeu si sistem i shpërndarjes së dezinformatave për një operacion ndikimi që dyshohet të jetë drejtuar nga BIA për ta pamundësuar konstituimin e parlamentit të Republikës së Kosovës.
E përballëm Milaim Zekën me pyetjet tona dhe ai u përgjigj me atë që, mbi bazën e verifikimeve që kryem në prill17, mund t’i quajmë gënjeshtra, Zeka pretendoi se “krejt materialet” ia kishte dërguar një “Faik Imeri”, të cilin e paraqet si ish-agjent të CIA-s me nofkën “Floriani”. Kjo bie ndesh me provat që kemi dokumentuar më herët mbi lidhjet e tij të ngushta me Halit Sahitaj, përfshirë komunikime, ndërveprime të gjurma dhe deklarime publike, ashtu edhe me pohimet e vetë Zekës në studio, ku burimin e lidhi me Fatmir Shehollin (USB-ja).
Sipas gjetjeve tona hulumtuese, Zeka dhe Sahitaj vepronin si një dyshe dezinformuese, përzgjedhje dhe përpunim materialesh të pakonfirmuara, copëzim e serializim me kohëzim politik për efekt maksimal, duke i transmetuar ato përmes mediave aleate dhe duke përdorur kompromate për presion ndaj figurave kyçe, me synim minimin e besueshmërisë së institucioneve përfshirë Dhomat e Specializuara në Hagë dhe shpërqendrimin e proceseve kushtetuese në Prishtinë.
Në plan analitik, përgjigjja e Zekës është shmangie e qëllimshme:
(1) ndryshim i beftë i burimit (nga Sheholli/USB te një personazh i paverifikuar “Faik Imeri”);
(2) thirrje te një “autoritet” i rremë (“ish-CIA”) për të zëvendësuar mungesën e provave;
(3) asnjë zinxhir posedimi, asnjë ekspertizë forenzike, as metadata që ta bëjnë materialin të testueshëm;
(4) kundërthënie me deklarimet e mëparshme dhe me gjetjet hulumtuese për rolin e BIA-s;
(5) kohëzim i përputhur me objektivat politike të Beogradit.
Kjo është teknika klasike “shmang e mjegullo”: zhvendosje e vëmendjes te një figurë e paverifikuar, krijim mjegulle rreth origjinës së skedarëve dhe imponim narrativash konspirative për të shmangur pyetjet themelore kush, kur, si dhe me ç’dokumente. Deri sa të paraqiten prova të verifikueshme (regjistrime të plota, metadata, dokumentim dorëzimi dhe korrespondencë zyrtare), pretendimet e Zekës mbeten të pabazuara dhe shërbejnë si mbulesë për një operacion ndikimi ku ai vetë ka qenë hallkë kyçe.
Vetë Rashiq, nën breshërinë e fundit para përmbylljes së konstituimit të Kuvendit, reagoi me kujdes. Në një konferencë në Graçanicë më 10 tetor18, ai tha se në fund të korrikut disa bashkëpunëtorë të afërt u kontaktuan nga numra serbë prej personash që u prezantuan si të lidhur me strukturat e inteligjencës së Beogradit, duke kërkuar takime dhe duke kërcënuar se do të publikonin materiale “komprometuese” nëse refuzonin. Rashiq tha se, kur mori vesh se redaksi të caktuara kishin marrë inçizime, e njoftoi policinë, audio-kasetat e “Pa Rrotlla”-s i quajti të montuara. Të nesërmen, teksa presidenca mandatoi Albin Kurtin të formonte qeverinë pas votimit të lidershipit19, u bë edhe më i qartë konteksti, drejtuesit e Kosovës akuzonin hapur Serbinë për ndërhyrje të drejtpërdrejtë në prag të zgjedhjeve lokale të 12 tetorit20, përfshirë blerje votash dhe frikësime në zonat me shumicë serbe.
Në këtë dritë, ia vlen të shihet metoda redaksionale e “Pa Rrotlla”-s. Faqja publikoi “transkripte” me boshllëqe, rreshta të pjesshëm dhe kornizim autorial që i tregonte lexuesit se çfarë të konkludonte. Nuk ofroi audio të plota, as të dhëna të verifikueshme, as zinxhir prove. Palëve të akuzuara nuk u dha realisht e drejta e reagimit. Gazetarisht, ishte udhëzim, jo dokumentim. Madje edhe premisa u përkul sa t’i shërbente linjës së sulmit për ta etiketuar Rashiqin si “ministër i Qeverisë Kurti” për të krijuar përshtypjen e një goditjeje ndaj ekzekutivit, kurse, në prag të votimeve kyçe, objektivi politik ishte një serb i pavarur që përbënte sfidë kundër agjendës së Beogradit në Kosovë.
As kjo s’është hera e parë që Zeka vallëzon në hijen ku takohen media, politika dhe shërbimet e fshehta. Gjetjet tona hulumtuese shkurt-korrik, dokumentuan aleancën e tij publike me Halit Sahitaj21, figurë që burime evropiane e lidhin me rrjete të afërta me Moskën22, si dhe vetë-promovimin e Zekës si “kanal provash” kundër Dhomave të Specializuara, pretendime që u thërrmuan kur u kërkua provë. Në postimet e tij të fundvitit 2024, Zeka mburret se e ka bindur Sahitajn e një malazez (Darko Peroviç) për ta shtyrë një kundërrëfim ndaj prokurorëve të Hagës23. Gjykuar nga dëshmitë e një-pas-njëshme duket sikur Zeka vepron në detyrë të një operatori politik, dhe modeli është i njëjtë, pretendime madhështore, »rrjedhje« selektive, dhe afërsi e studiuar me tregtarët e kompromatit.
Episodi i fundit është më pak për retorikën e tij dhe më shumë për efektet. Dosja e Prokurorisë është e qartë, synimi i operacionit Zeka-Sheholli ishte mbledhja e informacionit për institucionet e Kosovës dhe trazimi i hapësirës informative përmes “publikimit në media online” të materialeve të destinuara të diskreditojnë zyrtarë të Ministrisë për Komunitete dhe Kthim. Nëse do të hartoje një strategji për ta bërë të papranueshme zgjedhjen e Nenad Rashiqit si nënkryetar të Kuvendit, do të ndiqje pikërisht këtë skemë: parapërgatitje narrativesh diskredituese, kohëzim publikimesh me seancat e votimit, mbushje studiosh televizive me spekulime dhe mjegullim të regjistrimeve pikërisht kur vëzhguesit kërkojnë transparencë dhe zbatim rregullash.
Edhe klima politike kishte rëndësi. Ditët para arrestimit, Presidentja akuzoi Serbinë për ndërhyrje të drejtpërdrejtë në zgjedhjet komunale, Kurti në qeveri foli për një “model të përsëritur” premtimesh klienteliste, presioni e paraje, duke i bërë thirrje BE-së për vëmendje. Kur Kuvendi më në fund theu ngërçin dhe zgjodhi Rashiqin nënkryetar, AP dhe të tjerë vunë në dukje se zgjedhja sfidonte Listën Serbe. Në këtë prapaskenë, një seri “audio”-sh pikante që sikur tregonin rrethin e nënkryetarit serb duke “ndarë përqindje” nuk ishin thjesht klikime; ishin municion politik.
Mbrojtja e Zekës se po goditej si gazetar zbehet përballë asaj që ka pranuar vetë. Ai tha se i mori materialet komprometuese, organizoi përkthime, planifikoi serializim, dhe përgatitej për “pjesë” të tjera. Pranoi gjithashtu se kishte kontaktuar kreun e Prokurorisë Speciale për ta dorëzuar USB-në pas ditës së votimit “që të mos ndërhynte” në fushatë. Kjo kronologji flet vetë, nëse besonte se materialet provonin vepër penale, detyrimi ishte t’i dorëzonte menjëherë, jo t’i kthente në serial politik deri pas zgjedhjeve. Ky nuk është raportim; është programim.
Ajo çfarë mbetet është pyetja që kosovarët e bëjnë sa herë bie perdja: kush është saktësisht përgjegjës për vektorin mediatik të një operacioni të tillë? Dosja emërton Shehollin dhe përmend udhëheqje të BIA-s Bojan Dimiç. Flet për pagesa për publikim dhe për portale që i pranuan pagesat. Nuk hedh (të paktën në pjesët e bëra publike) akuza ndaj atyre portaleve apo redaktorëve të tyre. Kjo mund edhe të ndodhë më vonë, mundet gjithashtu që prokurorët, duke prioritetizuar shtyllën kundër-inteligjente, të kenë goditur së pari kanalin “udhëzues-ekzekutues”. Por logjika e dosjes shkon poshtë rrjedhës, nëse publikimi është paguar për t’i mbështetur ndikimet armiqësore, atëherë kush ishin ndërmarrësit e tjerë?
Disa do të thërrasin për lirinë e shtypit, me të drejtë. Por liria forcohet, jo dobësohet, kur atyre që maskohen si gazetarë për të drejtuar operacione të errëta u kërkohet të përgjigjen në pyetje që çdo redaktor i mirëpret:
Kush ju furnizoi?
Çfarë bëtë për ta verifikuar?
Kur i njoftuat autoritetet për ekzistencën e incizimeve?
Pse e kohëzuat serializimin me votimet parlamentare?
Kush ju pagoi, dhe si?
Këto nuk janë censurë; janë minimumi i kujdesit në një shoqëri që përditë lufton luftën e informacionit.
Ka edhe një teh të fundit. Zeka u ndalua, por nuk u arrestua24. Dha dëshmi si “dëshmitar”, u kthye në studio dhe rifilloi ta portretizonte veten si protagonist i një drame politike të sajuar nga armiqtë e tij. Nëse narrativa e Prokurorisë qëndron dhe nëse paratë e Serbisë janë ndërruar në duar të operatorëve në Prishtinë me maskë gazetari për të futur përmbajtje armiqësore në rrjedhën mediatike të zgjedhjeve komunale, pse njeriu që e operacionalizoi këtë narrativë vazhdon të filmohet nëpër kafene? Ndoshta hetuesit po ecin lart zinxhirit? Ndoshta gjykojnë se ekspozimi më i qartë penal qëndron te i dyshuari dhe te trajtuesit e tij? Ndoshta ka edhe llogari të tjera në lojë, ekonomia ballkanike e sekreteve, favoreve dhe dosjeve në sirtarë. Në një vend ku dosjet shpesh i mbijetojnë qeverive, pyetja përgjigjet me një pyetje: kë e mban Zeka me kompromat?
Kosova nuk mund ta mbyllë këtë si një skandal tjetër i vjeshtës. Kuvendi sapo arriti të konstituohej, e presidenca i ka dhënë mandatin Kurtit të provojë formimin e kabinetit, zgjedhjet lokale po zhvillohen nën presion të dokumentuar në veri. Presidentja dhe kryeministri kanë akuzuar Serbinë për ndërhyrje; Shtetet e Bashkuara kanë sinjalizuar hapur padurimin me paralizën politike. Në këtë klimë, larja e një detyre të BIA-s serbe përmes një portali dhe studiove televizive nuk është shfaqje anësore, është mekanizëm operativ i pushtetit të Beogradit që na vjen me emrat e gazetarisë dhe mediave në Kosovë.
Ka një zgjidhje të thjeshtë. Nëse Zeka është gazetari që thotë se është, le ta publikojë audion e plotë, pa ndërprerje, le të verifikojë origjinën me ekspertë të pavarur forenzikë; le të deklarojë financuesit; le të tregojë email-et që dëshmojnë kontaktin e hershëm me prokurorët. Nëse nuk e bën, redaksitë në gjithë Kosovën duhet të ndalojnë ta trajtojnë si burim dhe ta shohin Zekën për atë që gjithnjë e më shumë tregon historia, një ndërmjetës narrativesh që shet rrëfime për ofertuesin më të lartë dhe, në këtë rast, ndihmoi të bartet ngarkesa e një shërbimi të huaj inteligjent në sheshin publik të Kosovës.
Gjykatat duhet ta përcaktojnë çfarë është krim. Pjesa tjetër është çështje standardesh. Vija mes gazetarisë dhe operacionit të ndikimit nuk është mjegull, është zgjedhje. Në fund të shtatorit, “Pa Rrotlla” bëri zgjedhjen e vet. Më 9 tetor, shteti bëri të vetën. Tjerat u takojnë prokurorëve t’i ndjekin paratë dhe mediat dhe redaktorëve që ende i japin mikrofon Milaim Zekës, në një vend që lufton çdo ditë për të mos e lënë demokracinë t’ia shkruajë dikush tjetër.
Nga USB te akuzat e fabrikuara: si funksionon aparati mediatik i Milaim Zekës
Në shqyrtimin e hollësishëm të materialeve të publikuara nga portali “Pa Rrotlla”, nën pronësinë dhe drejtimin editorial të Milaim Zekës, bëhet e qartë se ato nuk përfaqësojnë asnjë standard të pranueshëm të gazetarisë hulumtuese. Përkundrazi, përbëjnë një shembull tipik të përdorimit të formës gazetareske për qëllime propagandistike dhe diskredituese, …
Web Archive: /web/20251011204927/https://parrotlla.org/ekskluzive-biseda-e-ministrit-te-qeverise-kurti-nenad-rashiq-me-personin-e-quajtur-milan-dabic-ku-permenden-pagesa-e-plane-per-shpenzime-parash/
Then Zeka is given air time on KLAN Kosova and this is what his Portal reports:
https://parrotlla.org/zeka-prokuroria-speciale-ka-levizje-per-ti-marre-materialet-per-rashiqin-video/
Web Archive: /web/20251011205105/https://parrotlla.org/zeka-prokuroria-speciale-ka-levizje-per-ti-marre-materialet-per-rashiqin-video/
This is Klan Kosova’s Youtube aired Programme — YouTube Link.1st of Oct, 2025: https://parrotlla.org/pa-rrotlla-publikon-incizim-te-ri-diskutim-mes-nenad-rashiq-dhe-milan-dabic/
Web Archive: web/20251011210235/https://parrotlla.org/pa-rrotlla-publikon-incizim-te-ri-diskutim-mes-nenad-rashiq-dhe-milan-dabic/1st of Oct, 2025: https://parrotlla.org/pjesa-e-trete-e-pergjimit-traktori-kontrata-false-dhe-pagesat-permes-dhendrit-biseda-e-re-mes-nenad-rashiq-dhe-slavisha-popoviq/
Web Archive: /web/20251011210556/https://parrotlla.org/pjesa-e-trete-e-pergjimit-traktori-kontrata-false-dhe-pagesat-permes-dhendrit-biseda-e-re-mes-nenad-rashiq-dhe-slavisha-popoviq/
2nd of Oct, 2025: https://parrotlla.org/me-motren-apo-me-dhendrin-audioja-e-katert-zbulon-udhezimet-e-rashiq-per-perfitim-fondesh/
Rashiq zgjidhet nënkryetar i Kuvendit, Basha e shpall të përfunduar seancën konstituive — Kallxo.com
Kosovo lawmakers break 8-month deadlock with election of an ethnic Serb to the leadership team — AP.
Espionage Arrest Shadows Kosovo’s Parliamentary Breakthrough
Kosovo’s parliament constituted after electing Serb MP Nenad Rasic deputy speaker, ending months-long deadlock. An espionage arrest spotlights Belgrade’s influence operations. — The GPC Balkan Watch.
Kosovo lawmakers break 8-month deadlock with election of an ethnic Serb to the leadership team — AP.
Arrestohet Fatmir Sheholli nën dyshimet për spiunazh — Kallxo.com
Special Prosecution Formal Note | Facebook Post, Oct 10, 2025.
Xhelal Svecla’s Formal Note | Facebook Post, Oct 9, 2025.
Kosovo’s Capital Basic Court Formal Note | Facebook Post, Oct 10, 2025.
Video Post of Milaim Zeka on Facebook, 9 Oct, 2025.
Dosja e Prokurorisë: Fatmir Sheholli veproi nën urdhrat dhe udhëzimet e zyrtarit të BIA-s, Bojan Dimic — A.Info [Web Archive]
Zeka: Prokuroria Speciale ka lëvizje për t’i marrë materialet për Rashiqin (VIDEO) — Klan Kosova.
Një Gazetar, një Ndërmjetës dhe një Mjeshtër i Manipulimit
Milaim Zeka: dezinformues i lidhur me krimin dhe shërbimet ruse, që paguhet për të shtrembëruar narrativën e Kosovës për të goditur Tribunalin Kosovar të drejtësisë në Hagë. — Kronika B Hulumtime.
Rashiq: Disa persona me numër të Serbisë thirren bashkëpunëtorët e mi, i thanë se do t’i shfaqim në publik disa gjëra për ju — Kallxo.com
Kur Gjurmët Digjitale Rrëzojnë Mohimet e Zekës dhe Sahitajt
Fotografi, fluturime dhe rrëfime të regjistruara zbulojnë gjurmët digjitale dhe dëshmitë personale që ndriçojnë lidhjet e fshehta mes Milaim Zekës dhe Halit Sahitajt. — Kronika B Hulumtime.
Në Zemër të Makinerisë së Dezinformimit
Nga Krimi te Operacionet Sekrete: Si Halit Sahitaj dhe Milaim Zeka synojnë Tribunalin e Kosovës në një luftë të rrezikshme dezinformimi. Kush janë në të vërtetë këta? — Kronika B Hulumtime.
Milaim Zeka Facebook Post : ”Ky eshte raporti qe e ka fundosur Jack Smithin. Per keta koleget e mi, e “dostate” e Grenellit, po ju tregoje se roli im, edhe i koleges time, Edlira Qefalise, me ndihmen absolute te Halit Sahitajt, e kemi çmontuar veprimtarine kriminale dhe korruptive te Jack Smithit, gjate kohes qe ishte kryeprokuror ne Hage. Situata ka pesuar ndryshime rrenjesore kur kam arritur ta binde Halit Sahitajn dhe malazesin Darko, se Faik Imeri nuk ishte agjent as i CIA-as, as i agjencive tjera te spiunazhit amerikan, perpos nje agjent i trajnuar nga BIA serbe, i cili kishte detyre te gjente sa me shume deshmitar te rrejshem, te falsifikonte dokumenta me qellim te komprimitimit te figurave te ndryshme kombetare.” — Facebook Post. [PDF File — 10 Nëntor, 2024]
Ekskluzive- Pas arrestimit të Fatmir Shehollit, policia ndalon edhe Milaim Zekën, i cili ishte në takim me të — Kosova News.