Alarm për sigurinë e Gazetarit Vudi Xhymshiti mes thirrjeve të Hisen Berishës për “goditje të drejtpërdrejtë”
Hisen Berisha kërkon “goditje të drejtpërdrejtë”, Milaim Zeka e quan Xhymshitit “minuk”; kjo gjuhë e rajonit tonë historikisht i ka paraprirë dhunës kundër gazetarëve.
Në Prishtinë dhe Londër po rritet shqetësimi për sigurinë e gazetarit Vudi Xhymshiti, pas një vale të re sulmesh verbale dhe akuzash publike nga ish-deputeti kosovar Hisen Berisha dhe operatori politiko-medial Milaim Zeka.
Më 22 nëntor, Berisha publikoi në Facebook1 një deklaratë të gjatë, ku analistë dhe gazetarë, pa i emërtuar drejtpërdrejt, i përshkroi si “propagandistë që riciklojnë narrativat serbe kundër Kosovës”, “porta hyrëse e politikës serbe”, “zëdhënës të propagandës serbe”, dhe pjesë e një “rrjeti që duhet goditur drejtëpërdrejt, fortë dhe institucionalisht”. Në të njëjtin postim, ai shkruan se këta njerëz po shërbejnë “destabilizimit serb” dhe se po punojnë për ta “zhbërë legjitimitetin e shtetit të Kosovës”.
Edhe pse Xhymshiti nuk përmendet me emër, postimi vjen menjëherë pas një përplasjeje të ashpër mes tij dhe Berishës në një emision të lajmeve në MCN TV në Shqipëri më 21 nëntor2, si dhe është shoqëruar me publikimin e videos ku shihet debati mes tyre. Në atë emision, të transmetuar drejtpërdrejt3, Berisha e ofendoi Xhymshitin me gjuhë homofobike dhe u largua nga lidhja live pasi gazetari filloi të fliste për përpjekjet e qeverive të mëparshme për të toleruar apo lejuar strukturat paralele të Serbisë në Kosovë.
Disa orë pas deklaratës së Berishës, Milaim Zeka, ish-deputet dhe figurë mediatike e njohur, publikoi në Facebook4 videon e njëjtë dhe e shoqëroi me komentin: “Shihni këtë minukun nga Londra, që ma shumë rrinë në Beograd me Bojan Dimiçin e Faik Imerin, se sa me familjarët e tij.”
Komenti jo vetëm që përdor term dehumanizues ndaj gazetarit, por e lidh emrin e tij me persona që në diskursin publik shpesh përmenden në kontekst të shërbimeve të huaja dhe operacioneve të ndikimit, një akuzë e rëndë në një rajon ku dyshimet për lidhje me Beogradin kanë pasur edhe pasoja fizike.
Vetë Xhymshiti e ka cilësuar këtë seri sulmesh si përpjekje të koordinuara për ta paraqitur si “armik të shtetit” dhe si “vegël të Serbisë”, në mënyrë që kritika e tij ndaj rrjeteve të dyshuara të spiunazhit dhe dezinformimit të diskreditohet para publikut.
kujton se para se debati të degjeneronte, Berisha kishte folur për krimet e regjimit serb në Kroaci, Bosnje e Kosovë, por më pas kishte relativizuar vrasjet me snajper në Sarajevë duke thënë se një plumb i tillë ishte “më i shpejtë” e “më i lehtë” se torturat dhe masakrat. Gazetari thotë se aty ndërhyri, duke argumentuar se “vrasjet nuk krahasohen, krimet hetohen” dhe se “nuk ka mënyrë të butë për të vrarë civilët”.Në një analizë të botuar më 22 nëntor në “Kronikat e Barutit”5, ai përshkruan minutë pas minute debatin televiziv me Berishën, duke thënë se ish-deputeti “u thye para faktit, u arratis nga ekrani dhe u fsheh pas fyerjeve, duke provuar se e vërteta e tremb më shumë se çdo argument”.
Sipas tij, tensioni u rrit kur biseda kaloi në Kosovë dhe në përpjekjet e qeverisë aktuale për të ç’montuar ndikimin e Serbisë në veri. Ai thotë se Berisha kaloi nga argumenti tek fyerjet, duke përdorur gjuhë që “nuk i përket hapësirës publike”, deri në ndërprerjen e lidhjes nga ana e tij.
“Nuk iku për shkak të fyerjes, iku sepse nuk mund ta përballonte vazhdimësinë e argumentit,” shkruan Xhymshiti.
Në të njëjtën analizë, ai e lidh emrin e Berishës me rastin e Fatmir Shehollit, i cili ndodhet në paraburgim në Kosovë nën dyshimet për spiunazh në favor të shërbimit sekret serb. Në shkrimet e mëparshme hetimore në “Kronikat e Barutit”, Xhymshiti ka trajtuar lidhjet e dyshuara mes Shehollit dhe Milaim Zekës, duke i përshkruar si pjesë të një zinxhiri dezinformimi dhe ndikimi politik.
Tani, me hyrjen e hapur të Berishës dhe Zekës në debatin rreth figurës së tij, Xhymshiti dhe redaksia e “The Gunpowder Chronicles” thonë se situata ka marrë përmasa të reja. Në një deklaratë të publikuar më 23 nëntor6, redaksia shprehet se “Berisha nxit, Zeka i jep zë nxitjes, dhe të dy e dehumanizojnë hapur një gazetar në detyrë; një gjuhë që në historinë e këtij rajoni i ka paraprirë shpesh dhunës reale”.
Deklarata i referohet drejt për drejt standardeve ndërkombëtare për mbrojtjen e gazetarëve, duke përmendur rekomandimin CM/Rec(2016)4 të Këshillit të Evropës për sigurinë e gazetarëve, nenin 10 të Konventës Evropiane për të Drejtat e Njeriut, vendimet përkatëse të OSBE-së, Planin e Veprimit të OKB-së për sigurinë e gazetarëve dhe udhëzimet e UNESCO-s kundër nxitjes së urrejtjes ndaj mediave. Sipas “The Gunpowder Chronicles”, retorika e përdorur nga Berisha dhe Zeka bie poshtë standardit që kërkon që zyrtarët dhe figurat publike të “përmbahen nga stigmatizimi, sulmi ose minimi i punës legjitime të gazetarëve”.
Një element që e shton shqetësimin është konteksti politik dhe historik. Berisha ka qenë dhe është pjesë e një klase politike në Kosovë nën mandatet e së cilës, gjatë dhe pas luftës, gazetarë, aktivistë dhe politikanë janë vrarë apo janë zhdukur në rrethana të paqarta. Për këtë arsye, redaksia në Londër argumenton se fjalët e tij “kanë një peshë që nuk mund të relativizohet si retorikë e nxehtë”. Karikaturat editoriale të publikuara nga “The Gunpowder Chronicles”, ku Berisha paraqitet në mënyrë simbolike si figurë kërcënuese ndaj gazetarëve, sipas redaksisë, “nuk shfaqin dhunë fizike, por vizualizojnë kërcënimin e ngulitur në mesazhin e tij”.
Situata vjen në një moment kur Xhymshiti dhe ekipi i tij po përgatiten të udhëtojnë drejt Kosovës për të realizuar një film dokumentar/reportazh mbi historinë e tensioneve në veriun e vendit. Pas vandalizmit në shtëpinë e familjes së tij në tetor7, deklaratave të reja publike dhe përfshirjes së personave që ai i lidh me rrjete dezinformimi dhe ndikimi, redaksia pohon se rreziku për sigurinë e tij është “i menjëhershëm dhe i mprehtë”.
Më 13 tetor, Unioni Kombëtar i Gazetarëve në Britani (NUJ) doli me një deklaratë8 publike ku “shprehej i tronditur” nga vandalizmi i shtëpisë së familjes Xhymshiti dhe kërkonte hetim të plotë. Xhymshiti ka thënë se asgjë nuk është vjedhur, por se dritaret janë thyer dhe një makinë e vjetër familjare, të cilën e quan “makina përkujtimore e babait”, është dëmtuar rëndë, çka e shtyn ta lidhë ngjarjen me përpjekjet për ta frikësuar atë.
Tani, “The Gunpowder Chronicles” ka njoftuar se po përgatit dosje për t’iu dërguar disa institucioneve ndërkombëtare, përfshirë Ministrinë e Jashtme britanike, Komisionin e Jashtëm të Parlamentit britanik, Komitetin për Mbrojtjen e Gazetarëve (CPJ), Federatën Ndërkombëtare të Gazetarëve, Qendrën Evropiane për Lirinë e Shtypit dhe Medias, përfaqësuesin e OSBE-së për lirinë e medias, platformën e Këshillit të Evropës për sigurinë e gazetarëve, ambasadat e QUINT-it në Prishtinë dhe Asociacionin e Gazetarëve të Kosovës.
Ata kërkojnë që institucionet e Kosovës dhe partnerët ndërkombëtarë të marrin masa parandaluese, duke e trajtuar rastin si kërcënim serioz ndaj një gazetari që merret me tema të sigurisë dhe ndikimit të huaj.
“Në rajone ku retorika e tillë i ka paraprirë historikisht dhunës, heshtja nuk është neutrale,” thuhet në deklaratë. “Heshtja e normalizon rrezikun.”
As Berisha, as Zeka, deri në momentin e publikimit të këtij shkrimi, nuk kanë njoftuar ndonjë tërheqje apo sqarim publik të komenteve të tyre ndaj gazetarit.
Hisen Berisha u shemb para të vërtetës
Të premten e mbrëmshme isha në shtëpi, i mbërthyer mes dokumenteve dhe shënimeve hulumtuese që lidhen me një rast delikat që po hetohet në Londër. Kisha kaluar orë të tëra duke krahasuar disa prej të dhënave, dëshmitë, emailët, telefonatat që gjurmët e një dosjeje të errët i lënë pas vetes. Puna rridhte me ritëm të qetë, derisa telefoni ra. Ishin kolegë…
Hisen Berisha — Facebook Post, 22 Nëntor, 2025.
Milaim Zeka’s Facebook Post, 22 Nëntor, 2025.
Hisen Berisha u shemb para të vërtetës
Hisen Berisha u thye para faktit, u arratis nga ekrani dhe u fsheh pas fyerjeve, duke provuar se e vërteta e tremb më shumë se çdo argument. — Kronika B Analizë.
The Gunpowder Chronicles Condemns the Reckless Rhetoric Endangering a British-Based Journalist
Berisha incites, Zeka amplifies, and both openly dehumanise a working journalist, language that, in this region’s history, has repeatedly preceded real violence. This escalation is dangerous. — The GPC Official Dispatch.
Gazetari Vudi Xhymshiti dënon vandalizimin e shtëpisë familjare në Kosovë
Vudi Xhymshiti denoncon vandalizimin e shtëpisë familjare, duke e cilësuar si akt frikësimi nga rrjete kriminale që synojnë të heshtin gazetarinë e pavarur në Kosovë. — Kronika B Deklaratë Për Shtyp.
"Kronika e Barutit" është media më e mirë në hapësirën shqiptare dhe Vudi Xhymshiti është tamam gazetar i vërtetë dhe i denjë me plot integritet .
Kurse këta 'halabakat' si Hisen Berisha e Milaim Zeka do hedhen në koshin e mbeturinave më të fëlliqura të historisë sonë të këtyre 3 dekadave pas çlirimit të Kosovës nga zghedha serbe.