Kur Qytetarët Folën dhe Propaganda Filloi të Ulërasë

Kosova votoi kundër plaçkitjes kundër nënshtrimit dhe kundër gënjeshtrës së paketuar si stabilitet përderisa propaganda po përpiqet ta shesë verdiktin si keqkuptim.

Pas 28 dhjetorit 2025, kur qytetarët e Kosovës folën qartë dhe pa asnjë paqartësi, u mbyll një kapitull i gjatë mashtrimesh politike dhe u hap një betejë e re. Jo më për pushtetin formal, por për kuptimin e asaj që ndodhi¹. Vota e këtij dimri pa borë nuk ishte vetëm votë për një qeveri tjetër. Ishte refuzim i një rendi të vjetër, i ndërtuar mbi krim, frikë dhe nënshtrim ndaj interesave të Serbisë. Pikërisht në këtë moment, kur verdikti qytetar nuk linte vend për keqlexime, makineria e mjegullimit u vu në lëvizje.

Disa ditë më pas, dola në NTV Albania në një bisedë me Red Varakun, jo për të bërë analizë televizive të radhës, por për ta thënë hapur atë që shumë e dinë dhe pak e artikulojnë. Nuk shkova për të kërkuar miratim. Shkova për të vendosur kufij. Sepse kur e vërteta nuk thuhet me zë të lartë, ajo tjetërsohet, copëzohet dhe më pas shitet si “opinion”.

Në këtë intervistë thashë qartë se fitorja e zgjedhjeve ishte porosi direkte për entitetet kriminale që për më shumë se dy dekada e kanë administruar Kosovën si plaçkë lufte. U thashë se fshehja pas partive politike, mediave të blera apo figurave teatrale nuk i shpëton nga llogaridhënia. “Vulë nuk do t’ju japim”, ishte përkthimi politik i asaj vote. Populli i Kosovës vendosi se nuk e do Serbinë në Kosovë dhe nuk e do as politikën që e ka futur Serbinë në Kosovë duke u betuar rrejshëm në simbole çlirimtare.

Fola për lodhjen e thellë shoqërore nga një cikël i pafund rotacionesh me të njëjtin mision. Plaçkitje e parasë publike, kapje e institucioneve dhe instalim i kontrollit politik nga Beogradi. Thashë se drejtësia nuk është dekor dhe as slogan, por mjeti i vetëm për shërimin e republikës. Pa veting, pa prokurori të pavarur dhe pa shembjen e arkitekturës ligjore që u ndërtua për të mbrojtur grabitjen edhe kur pushteti humbet, nuk ka shtet funksional.

Në këtë kontekst fola edhe për Shqipërinë. Thashë pa u hamendur… pa mëdyshje se eksporti i prokurorëve nuk është zgjidhje dhe se Shqipëria duhet të pastrohet në shtëpinë e vet. Një administratë si ajo e Edi Ramës që bashkëjeton me krimin e organizuar nuk mund të shesë moral rajonal. Po ashtu, i thashë Tiranës zyrtare se afrimi i saj politik me Beogradin, në dëm të Kosovës, nuk është diplomaci, por tradhti kombëtare.

Kur u ngrit çështja e marrëdhënieve me Shtetet e Bashkuara të Amerikës dhe Bashkimin Evropian, sqarova një keqinformim të qëllimshëm. Nuk ka shkëputje strategjike me SHBA-të kur vetë strategjia e tyre e sigurisë e përfshin Kosovën si interes të drejtpërdrejtë dhe refuzon projekte që e ndajnë vendin në vija etnike². Ajo që quhet “ndëshkim” nga BE-ja është presion politik për ta detyruar Kosovën të pranojë marrëveshje të dëmshme të trashëguara nga liderë të korruptuar.

Thashë po ashtu se reagimi i Kosovës ndaj operacionit paraushtarak serb në veri ishte reagim i një shteti që më në fund e ushtron sovranitetin e vet. Barikadat u hoqën sepse shteti ekzistoi. Për herë të parë pas më shumë se dy dekadash, Kosova nuk u tërhoq përballë shantazhit të Beogradit dhe veglave të tij lokale.

Sa i përket normalizimit me Serbinë, isha i drejtpërdrejtë dhe pa kompromis. Nuk ka normalizim pa njohje, pa pranim të gjenocidit, pa kthim të të zhdukurve, pa dëmshpërblim dhe pa garanci të tërheqjes ushtarake. Çdo përpjekje për t’i anashkaluar këto përgjegjësi është mashtrim politik. Çdo projekt që e ndan Kosovën mbi baza etnike, qoftë administrative apo territoriale, është i papranueshëm, pavarësisht se nga kush vjen.

Kur fola për Albin Kurtin dhe Vjosa Osmanin, nuk fola për persona, por për standard. Thashë se kjo fitore nuk është fitore e një njeriu, por e qytetarëve që zgjodhën integritetin mbi frikën. Kur politika drejtohet nga njerëz që nuk korruptohen dhe nuk shantazhohen, atëherë edhe shteti fillon të marrë frymë. Kjo është arsyeja pse qytetarët i mbështesin dhe do t’i mbështesin edhe në të ardhmen figura të tilla.

Kjo intervistë nuk ishte akt qartësie morale. Ishte përpjekje për ta mbrojtur kuptimin e votës nga ata që duan ta relativizojnë. Republika nuk mbahet me kompromise me krimin dhe as me paqe të rreme. Ajo mbahet me parim, drejtësi dhe guxim për t’i thënë gjërat ashtu siç janë.

Intervistën e plotë mund ta shihni më poshtë.

1. Kosova Rikthen Mandatin Demokratik

Me një mandat të tretë, Lëvizja Vetëvendosje mori miratimin qytetar për sovranitet, integritet institucional dhe rezistencë ndaj ndikimit politik dhe kriminal të Serbisë. — Kronika B Politikë.

2. Washingtoni ia mbyll derën Asociacionit të Komunave me Shumicë Serbe në Kosovë

Ligji i ri amerikan e kufizon Serbinë dhe mbështetësit e saj duke refuzuar modele etnike dhe duke e mbyllur rrugën e Asociacionit me Komuna Serbe të llojit ‘Republika Srpska’ brenda Kosovës sovrane. — Kronika B Politikë.