Pse Marshimi i Zadarit është një Atentat ndaj Drejtësisë

Mobilizimi i veteranëve në Zadar e instrumentalizon patetizmin historik për ta mbrojtur pandëshkueshmërinë e një elite që i tradhtoi idealet çlirimtare përmes krimeve politike ndaj vetë shqiptarëve.

Në një kthesë groteske të ironisë historike, ndërsa vlerat e luftës çlirimtare përpëliten nën pluhurin e harresës dhe kompromiseve cinike, pasardhësit e vetëshpallur të idealit të lirisë kanë lëshuar një kushtrim të ri. Përmes një njoftimi solemn në Facebook¹, Organizata e Veteranëve të Luftës së Ushtrisë Çlirimtare të Kosovës (OVL-UÇK) u bën thirrje shqiptarëve që t’i bashkohen një proteste më 5 korrik 2026, në qytetin e Zadarit, në Kroaci. Ky organizim, i rreshtuar nën shenjën e solidaritetit me ish-krerët e UÇK-së në Hagë, vjen si një krismë e zbrazët baruti, një përpjekje për ta ricikluar nostalgjinë në një teatër të ri të absurditetit.

Por sa peshon ky moralizim i ri, kur vetëm një vit më parë, më 18 maj 2025, e njëjta organizatë u gjunjëzua para një letre të turpit², duke i lypur drejtësi dikujt si Richard Grenell, një propagandisti e mercenari të dekoruar nga Aleksandar Vuçiq?

Richard Grenell, në të majtë, duke pranuar dekoratën 'Urdhri i Flamurit të Serbisë' nga Presidenti i Serbisë, Aleksandar Vuqiç, në të djathtë. Ky moment reflekton vlerësimin e një figure që historikisht ka mbështetur agjenda pro-serbe në rajon, nga një lider i cili dikur ka shërbyer si ministër propagande i regjimit të Milosheviçit, të njohur për krimet kundër njerëzimit në Ballkan, veçanërisht në Kosovë.

Ata që dikur pretendonin se e luftonin tiraninë e Beogradit, pështynë mbi varret e dëshmorëve duke e përqafuar një diplomat të diskredituar që orkestroi rrëzimin e qeverisë demokratike të Kosovës. Ky rreshtim me strukturat e pandëshkueshmërisë dhe interesat e Kremlinit zbulon një të vërtetë të hidhur: braktisjen e idealeve të pastra për lojëra të vogla pushteti. Fushata e madhe mediatike, e nisur me pompozitet, sot duket si një jehonë e zymtë ku fijet të çojnë deri te figura të dyshimta, madje edhe të arrestuar për spiunazh në favor të Serbisë. Ky amalgamë e interesave kriminale dhe politike nuk kërkon mbrojtjen e integritetit të Kosovës, por shkatërrimin e arkitekturës ligjore për t’i ikur llogaridhënies.

Fatmir Sheholli, i arrestuar nën dyshimet për spiunazh në favor të Serbisë. Emri i tij u shfaq në fushatën publike që kërkonte mbështetje për ish-krerët e UÇK-së, duke thelluar pyetjet mbi aleancat që e ushqejnë këtë mobilizim.

Sipas dokumenteve zyrtare të Prokurorisë³, ky agresion retorik ndaj institucioneve të drejtësisë nuk është gjë tjetër veçse një taktikë e dëshpëruar entitetesh që sillen si sindikata mafioze. Ndërsa thonë se llogaridhënia është konspiracion perëndimor, ata harrojnë se Dhomat e Specializuara u themeluan nga vetë Kushtetuta e Kosovës për t’i hetuar kapitujt e errët të pasluftës: vrasjet politike, torturat dhe abuzimet për përfitime personale. Populli i Kosovës, familjet e viktimave dhe qytetarët që e zgjodhën ligjin para plumbave mbeten pronarët e vërtetë të historisë. OVL e UÇK-së mund të zgjedhë ta paguajë stilin e jetesës së mercenarëve si Grenell me naivitetin e saj, por historia do t’i mbajë mend jo si çlirimtarë, por si tradhtarë të shpirtit të lirisë.

Por nëse kjo protestë synon të paraqitet si marshim për drejtësi, atëherë qytetarët e Kosovës meritojnë ta dinë se çfarë po u kërkohet të mbrojnë.

Jo mitet. Jo slloganet. Por atë që përshkruhet në dokumentin përfundimtar të Prokurorisë së Kosovës në Hagë.

Nëse je shqiptar që beson se vota e lirë e marsit 1998 duhej trajtuar si armike, sepse populli zgjodhi sërish Ibrahim Rugovën dhe LDK-në në vend të projektit politik të Hashim Thaçit, atëherë po, shko në Zadar.

Nëse je shqiptar që beson se deputetët shqiptarë duhej të arrestoheshin, të merreshin në pyetje me forcë dhe të detyroheshin ta mohonin Ibrahim Rugovën e institucionet e Republikës së Kosovës që po i rrezistonin regjimit gjakatar e gjenocidal të Millosheviqit, atëherë po, shko në Zadar.

Nëse je shqiptar që mendon se çdo gazetar, intelektual, veprimtar, ushtar i FARK-ut, mbështetës i LDK-së apo qytetar që nuk e pranonte autoritetin e një komande të vetëshpallur meritonte etiketën “tradhtar”, atëherë po, shko në Zadar.

Nëse je shqiptar që beson se burgosjet pa gjyq, rrëmbimet, torturat, zhdukjet me forcë dhe vrasjet politike mund të arsyetohen në emër të çlirimit, atëherë po, shko në Zadar.

Nëse je shqiptar që nuk tronditesh kur lexon se njerëzit u morën nga shtëpitë e tyre, u dërguan në qendra ndalimi, u rrahën deri në pavetëdije, u poshtëruan, u detyruan të shikonin torturimin e bashkëvuajtësve dhe shumë prej tyre nuk u kthyen më kurrë, atëherë po, shko në Zadar.

Nëse je shqiptar që e quan normale që familje të tëra të jetojnë për dekada pa e ditur ku përfunduan bijtë e tyre, sepse dikush vendosi se pushteti vlente më shumë se jeta, atëherë po, shko në Zadar.

Nëse je shqiptar që beson se kundërshtarët politikë duhej të eliminoheshin me grykë të pushkës (përfshirë luftëtarët e lirisë) që një grup njerëzish ta monopolizonte pushtetin në Kosovën e pasluftës, atëherë po, shko në Zadar.

Nëse je shqiptar që mendon se askush nuk duhet të japë llogari për vrasjet politike, torturat, zhdukjet me forcë dhe persekutimin e shqiptarëve të tjerë vetëm sepse autorët mbanin emblemën e UÇK-së, atëherë po, shko në Zadar.

Sepse kjo është pyetja që e ngre dosja e Prokurorisë. Jo nëse UÇK-ja ishte e drejtë në luftën e saj kundër regjimit të Millosheviqit. Lufta jonë çlirimtare nuk është në gjykim. Në gjykim është diçka krejt tjetër: pretendimi se një grup drejtuesish e përdori autoritetin e fituar në luftë për ta kthyer armën kundër shqiptarëve që nuk iu bindën.

Prandaj mos e quani këtë marshim për mbrojtjen e UÇK-së. Quajeni me emrin që i takon. Një marshim kundër llogaridhënies. Një marshim për pandëshkueshmërinë. Një marshim kundër të vërtetës. Një marshim kundër drejtësisë.

Një marshim që u kërkon shqiptarëve t’i mbyllin sytë para pretendimeve për vrasje politike, torturë, rrëmbime dhe zhdukje me forcë vetëm sepse të akuzuarit dikur e mbajtën armën e luftës.

Sepse mbrojtja e UÇK-së nuk fillon duke i mbrojtur ata që akuzohen se e njollosën atë. Mbrojtja e UÇK-së fillon duke e ndarë sakrificën e mijëra luftëtarëve të ndershëm nga ata që, sipas Prokurorisë, e shndërruan luftën për liri në një instrument për pushtet, frikë, hakmarrje, vrasje dhe plaçkitje.

---

---

1. Postimi i OVL-së në Facebook, 29 Qershor, 2026.

2.

3. Public Redacted Version of ‘Corrected Version of “Prosecution Final Trial Brief” with public redacted Annexes 1-3 — KSC-BC — 2020-06 PDF.