Termi “kolona e pestë” nuk është figurë letrare. Është sinjal.

Milaim Zeka përdor gjuhë që sipas burimeve tona në Londër kanë qenë kod i brendshëm i shërbimeve sekrete ruse dhe ato serbe për identifikim objektivash.

Sipas burimeve tona në Londër, përdorimi i këtij termi nga Kremlini ka qenë për dekada një kod i brendshëm operacional. Që nga vitet 80 në terrenet e trajnimit të ish Bashkimit Sovjetik dhe më pas të shërbimeve sekrete të Federatës Ruse. Një term shumë sekret dhe ekskluziv vetëm për të trajnuarit. Në këtë kontekst “kolona e pestë” nuk nënkuptonte debat politik. Nënkuptonte shënjestërim.

Sot Vladimir Putin e përdor hapur këtë gjuhë¹. Një artikull i publikuar nga Washington Post e citon Putinin të ketë thënë se Perëndimi synon të provokojë trazira civile në Rusi duke përdorur kolonën e pestë. Por kjo nuk është e re. Putin e ka përdorur të njëjtën ide që në vitin 2014 gjatë aneksimit të Krimesë për të shënjestëruar kundërshtarët e brendshëm dhe për të disiplinuar shoqërinë përmes frikës.

Historia tregon se kur Kremlini flet për armiq të brendshëm dhuna zakonisht vjen më pas.

Në këtë sfond pyetjet për Kosovën janë të pashmangshme.

Ndër figurat publike shqiptare që sipas hetimeve tona shfaqen të rreshtuara në mënyrë të qëndrueshme me interesat e Moskës dhe Beogradit kundër Kosovës është Milaim Zeka. Pyetja është e drejtpërdrejtë.

Ku është trajnuar Milaim Zeka?

Gjetjet tona hulumtuese sugjerojnë se kontaktet e para direkte dhe puna e mundshme operative e Zekës me shërbimet jugosllave datojnë që në vitet 80². Në atë kohë ai dhe (ish) bashkëshortja e tij punonin për linjën ajrore jugosllave JAT në Suedi. Sipas burimeve suedeze ata dyshohet se dërgonin emra mbiemra dhe adresa të shqiptarëve etnikë që po largoheshin nga Jugosllavia për t’i shpëtuar persekutimit në prag të goditjes sistematike të të drejtave dhe lirive të shqiptarëve të Kosovës.

Gjetjet tona hulumtuese sugjerojnë gjithashtu bashkëpunim të afërt operacional mes Zekës dhe Halit Sahitajt shtetas serb me origjinë shqiptare nga Kosova³. Sipas burimeve të shumta evropiane Sahitaj dyshohet të jetë i përfshirë në bashkëpunim me GRU-në ruse në operacione kundër aktivistëve anti Putin në Evropë. Disa prej këtyre rasteve kanë përfunduar me humbje jete⁴. Të njëjtat burime e lidhin Sahitajin edhe me ndihmën në atentatin ndaj Skripalëve në Mbretërinë e Bashkuar.

Sipas gjetjeve tona Milaim Zeka ka shkëmbyer pamje nga lufta me Sladana Zariç⁵ një bashkëpunëtore e afërt e Aleksandar Vulin pjesë kyçe e aparatit të sigurisë së Beogradit. Zariç si producente pranë Radio Televizionit të Serbisë ka përdorur pamjet e ofruara nga Zeka për të prodhuar një film dokumentar që e akuzon UÇK-në për trafik organesh. Kjo akuzë është një narrativë e fabrikuar nga Beogradi dhe është hedhur poshtë nga mekanizma dhe procese ndërkombëtare në Hagë.

Më tej sipas hetimeve tona të publikuara më herët Zeka i ka shkruar institucioneve në Hagë duke akuzuar UÇK për krime lufte dhe krime kundër njerëzimit⁶. Kjo qasje përputhet me narrativat e prodhuara dhe të ricikluara prej vitesh nga struktura shtetërore serbe dhe ruse.

Zeka sipas burimeve tona dyshohet të ketë qenë i përfshirë edhe në operacione dezinformimi në Kosovë duke shpërndarë materiale të fabrikuara përmes palëve të treta dhe rrjeteve mediatike. Arrestimi i tij së bashku me Fatmir Shehollin nga autoritetet e sigurisë së Kosovës ndodhi gjatë një shkëmbimi materialesh komprometuese sipas burimeve të sigurisë.

Kur Putini flet për “kolonën e pestë” historia sovjetike paralajmëron për spastrim. Kur e njëjta logjikë shfaqet në periferitë e Evropës pyetja nuk është nëse ekziston rreziku. Pyetja është sa gjatë është injoruar.

Gjuha e “kolonës së pestë” nuk funksionon në vakum. Ajo kërkon ekosistem. Kërkon bartës. Kërkon media zëra dhe platforma që e normalizojnë narrativën e riciklojnë dhe e fusin gradualisht në diskursin publik derisa kufiri mes opinionit dhe operacionit të bëhet i paqartë.

Në këtë kuadër rasti i Milaim Zekës⁷ nuk mund të trajtohet si devijim individual. Ai shfaqet si nyje.

Aktiviteti i tij ndër vite sipas gjetjeve tona shfaq një model të përsëritur. Kontakte të hershme me struktura sigurie serbe. Shkëmbim materialesh lufte me aktorë mediatikë të lidhur me aparatin e sigurisë serbe. Përfshirje në narrativa të diskredituara kundër UÇK-së. Kanalizim materialesh drejt institucioneve ndërkombëtare. Dhe më pas riprodhim i tyre në hapësirën mediatike të Kosovës përmes rrjeteve ndërmjetëse.

Kjo nuk është thjesht çështje qëndrimesh politike.

Është çështje funksioni.

Kur një individ shfaqet vazhdimisht si burim përcjellës dhe legjitimues i narrativave që përkojnë në mënyrë të përsëritur me interesat strategjike të Beogradit dhe Moskës pyetja nuk është nëse ai ka opinion. Pyetja është nëse ai po kryen rol operacional në një fushë më të gjerë të luftës psikologjike dhe informative.

Rreziku nuk qëndron vetëm te Zeka. Ai shumëfishohet nga rrjeti i entiteteve mediatike që e ftojnë e riciklojnë dhe e paraqesin si analist apo burim kredibil. Me ose pa vetëdije këto platforma funksionojnë si zëdhënës të një narrative që synon t’i relativizojë krimet serbe të kriminalizojë luftën çlirimtare me maska të shumëfishta dhe të minojë themelet e shtetësisë së Kosovës.

Në doktrinën ruse të luftës hibride kjo njihet si faza e normalizimit. Nuk kërkon spiunë klasikë. Kërkon zëra lokalë. Kërkon debat televiziv. Kërkon “opinione alternative”. Dhe mbi të gjitha kërkon mungesë llogaridhënieje.

Ftesat e vazhdueshme për Zekën si mysafir pa transparencë mbi historikun e tij dhe pa ballafaqim serioz me faktet nuk janë neutrale. Ato krijojnë efekt kumulativ. Helmim i diskursit publik. Deformim i perceptimit shoqëror. Dhe në një shtet të brishtë pas konfliktit kjo përbën rrezik real për sigurinë kombëtare.

Përgjegjësia nuk është vetëm individuale. Është institucionale dhe mediatike. Entitetet që kanë shërbyer si platformë për këtë zinxhir narrativash duhet të mbajnë përgjegjësi publike ligjore dhe profesionale. Jo për mendime por për rolin e tyre objektiv në një operacion ndikimi qoftë edhe përmes neglizhencës.

Në epokën kur Moska flet hapur për “kolona të pesta” injoranca nuk është më arsyetim. Heshtja nuk është neutralitet. Dhe përsëritja e propagandës nuk është gazetari.

Pyetja tani nuk është nëse këto struktura ekzistojnë. Pyetja është nëse shoqëria dhe institucionet e Kosovës janë të gatshme t’i quajnë me emër dhe t’i trajtojnë siç kërkon interesi kombëtar.

Sipas këtyre gjetjeve, Milaim Zeka nuk vepron thjesht si opinionist, por si nyje që i lidh temat e fabrikuara, fjalorin e shënjestrimit dhe kanalet e përforcimit në një zinxhir funksional. Kjo është fiks ajo që studiuesit e dezinformimit e përshkruajnë si qëllim operacional.

Thomas Rid shkruan se “qëllimi i dezinformimit është të inxhinierojë ndarjen, emocionet mbi analizën, konfliktin mbi konsensusin”.

Peter Pomerantsev e përshkruan po ashtu logjikën si një propagandë që “nuk është për të bindur, por për të mbajtur publikun të hutuar e të shpërqendruar”.

Kur një aktor i vetëm dhe rrjeti i mediave që e ftojnë e riciklojnë i kthejnë mallkimet, poshtërimet dhe polarizimin në program të përditshëm, rezultati është dryshku i botës së përbashkët.

Hannah Arendt paralajmëron se “vija mes të vërtetës dhe gënjeshtrës gërryhet nga gënjeshtra e vazhdueshme”.

Sa më shumë vonohet veprimi institucional për hetim, transparencë dhe përgjegjësi ligjore, aq më shumë forcohet kjo makineri dhe aq më pak qytetarët e Republikës së Kosovës do të mund të flasin bashkë për hallet e tyre, të organizohen dhe të mbrojnë vendin dhe të drejtat e tyre.

---

1. Putin’s warning about Russian ‘fifth columns’ has a long, sordid lineage — Washington Post.

2. Një Gazetar, një Ndërmjetës dhe një Mjeshtër i Manipulimit

Milaim Zeka: dezinformues i lidhur me krimin dhe shërbimet ruse, që paguhet për të shtrembëruar narrativën e Kosovës për të goditur Tribunalin Kosovar të drejtësisë në Hagë. — Kronika B Hulumtim.

3. Kur Gjurmët Digjitale Rrëzojnë Mohimet e Zekës dhe Sahitajt

Fotografi, fluturime dhe rrëfime të regjistruara zbulojnë gjurmët digjitale dhe dëshmitë personale që ndriçojnë lidhjet e fshehta mes Milaim Zekës dhe Halit Sahitajt. — Kronika B Hulumtim.

4. Brenda Komplotit për Shkatërrimin e Gjykatës Speciale

Si më ofroi një person me nofkën ‘Laky Laky’ 5,000 euro për të botuar një tregim të rremë për Richard Grenell, duke e demaskuar një rrjet të madh të dezinformimit kundër drejtësisë në Kosovë. — Kronika B Hulumtim.

Në Zemër të Makinerisë së Dezinformimit

Nga Krimi te Operacionet Sekrete: Si Halit Sahitaj dhe Milaim Zeka synojnë Tribunalin e Kosovës në një luftë të rrezikshme dezinformimi. Kush janë në të vërtetë këta? — Kronika B Hulumtim.

5. Postimi i Milaim Zekës në Facebook 27 Nëntor, 2024 ku ndër të tjera ai shkruan: “ ….. per nje te drejte autoriale qe “Mozaiku” i kishte dhene RTS, per perdorimin e disa pamjeve te luftes te Koshares, qe veq kane qene te shfaqura ne YouTube. Takimi eshte mbajtur ne International Prishtina Hotel. Nga Beogradi ka ardhur nje gazetare femer, nje mashkull, une, dhe gruaja ime. Pas nenshkrimit te marreveshjes, kemi rene dakort qe shuma prej 1950 euro te paguhej ne konton e nuses time ne Tirane….. “ [https://www.facebook.com/milaimzekaobri/posts/pfbid0gHfLXgqUJGP7JJLoUCyXpehv4MPXfMoevjiSYUBfQqxQzu9ivizYvQnkp46CrCGPl]

Postimi i Milaim Zekës, i arkivuar nga redaksia jonë në format PDF, lidhet me pamjet e luftës që ai ia kishte shitur producentes së Radio Televizionit të Serbisë, Sladana Zaric — [PDF File].

6. Letra që e fundos patriotin e zëshëm Milaim Zeka

Hashim Thaçi e votoi Gjykatën Speciale dhe quajti kundërshtarët e saj tradhtarë. Zeka e quan tradhti Hagën, por e kishte dorëzuar një rrëfim personal në Hagë. Ne e kemi dokumentin që e dëshmon atë. — Kronika B Hulumtim.

7. Propaganda serbe e zorrës së trashë, Milaim Zeka acarohet keq! -Rrethi Katror — Top Channel.

Milaim Zeka përdor edhe këtu terminologjinë e të trajnuarve rusë — Gazeta Blic.