Dosja financiare e Milaim Zekës

Vetëm gjatë viteve 2012–2017, në qarkullimin financiar të Milaim Zekës figurojnë € 304.444,92 euro, shifra që sfidojnë realitetin ekonomik të gazetarisë në Kosovë. Kush po e financon Zekën?

Dokumentet që kanë ardhur në posedim të Gunpowder Chronicles janë akte zyrtare të prodhuara brenda sistemit të drejtësisë së Kosovës. Fjala është për një Mendim Konstatues të Ekspertizës Financiare Gjyqësore, të urdhëruar nga gjykata kompetente dhe të hartuar nga një grup ekspertësh financiarë të liçencuar, në kuadër të një procedure penale aktive. Ekspertiza është bazuar në të dhëna të siguruara nga Administrata Tatimore e Kosovës, në dokumentacion bankar, deklarime fiskale dhe analiza krahasuese të të ardhurave dhe shpenzimeve për një periudhë disa vjeçare.

Ky dokument nuk është raport investigativ mediatik, as opinion i jashtëm. Është akt teknik i prodhuar për nevojat e gjykatës, me gjuhë neutrale dhe metodologji standarde.

Në faqet e përzgjedhura të dokumentit (3, 5–11 dhe 14), ekspertiza financiare paraqet gjetjet teknike të bazuara në analiza krahasuese mes të ardhurave të deklaruara, qarkullimit real financiar dhe detyrimeve ligjore tatimore për disa vite radhazi. Dokumenti përshkruan metodologjinë e përdorur nga grupi i ekspertëve, burimet institucionale të të dhënave dhe përfundimet numerike që rezultojnë nga këto analiza, duke konstatuar mospërputhje financiare dhe detyrime të papaguara tatimore dhe kontributesh në shumën totale prej 67.609,71 euro. Këto përfundime paraqiten si gjetje profesionale të një ekspertize të urdhëruar nga gjykata, pa dhënë vlerësime penale, motive apo konkluzione për fajësi, të cilat mbeten ekskluzivisht në kompetencë të gjykatës.

Pamje nga Mendimi Konstatues i Ekspertizës Financiare Gjyqësore, i urdhëruar nga Gjykata Themelore në Prishtinë. Dokumenti përbëhet nga 14 faqe dhe është shqyrtuar në tërësi nga redaksia e Gunpowder Chronicles. Për publikim janë përzgjedhur vetëm faqe të caktuara që përmbajnë gjetje analitike dhe përfundime financiare relevante për interesin publik. Pjesë të tjera të dokumentit nuk janë publikuar pasi përmbajnë të dhëna personale, numra identifikues, informacione procedurale dhe elemente që, sipas ligjit në fuqi dhe standardeve profesionale, nuk janë të nevojshme për informimin e publikut dhe duhet të mbrohen për të respektuar privatësinë dhe parimin e prezumimit të pafajësisë.

Në të nuk flitet për motive apo qëllime, por për shifra. Dhe shifrat janë të qarta. Sipas ekspertizës, ekzistojnë detyrime të papaguara tatimore dhe kontribute të pashlyera në shumën 67.609.71 euro, të lidhura me aktivitetet ekonomike të Milaim Zekës dhe subjekteve juridike të ndërlidhura me të. Diferencat janë konstatuar përmes krahasimit mes të ardhurave të deklaruara dhe qarkullimit real financiar.

Në gjuhë të kuptueshme për publikun, dokumenti thotë se paratë kanë qarkulluar, por nuk janë deklaruar sipas detyrimeve ligjore. Kjo është arsyeja pse procedura penale ka nisur dhe pse gjykata ka urdhëruar ekspertizë të pavarur financiare. Sipas burimeve tona, kjo procedurë nuk është e re. Ajo ka nisur vite më parë dhe ka vijuar në heshtje institucionale, larg vëmendjes publike, deri në momentin kur këto akte kanë ardhur në posedim të redaksisë sonë.

Në përputhje me parimet bazë të gazetarisë investigative, Gunpowder Chronicles nuk ka publikuar dokumentet pa i dhënë subjektit të përfshirë mundësinë për të folur.

Pamje e emailit zyrtar të dërguar nga redaksia e Gunpowder Chronicles drejtuar Milaim Zekës, që përmban pyetje të detajuara mbi gjetjet e ekspertizës financiare gjyqësore. Pyetjet janë bazuar drejtpërdrejt në dokumentet e gjykatës dhe i janë dërguar subjektit përpara publikimit, në përputhje me parimet e së drejtës për përgjigje dhe etikën e gazetarisë investigative. Deri në momentin e publikimit, redaksia nuk ka marrë përgjigje.

Milaim Zekës i janë dërguar pyetje të shkruara, të bazuara drejtpërdrejt në gjetjet e ekspertizës. Pyetjet kishin të bënin me burimin e të ardhurave, me arsyen e mospërputhjeve tatimore, me statusin aktual të procedurës penale dhe me mënyrën se si ndër vite është ndërtuar një profil financiar që tejkalon ndjeshëm atë që zakonisht e prodhon profesioni i gazetarit në Kosovë. Ai kishte hapësirën për ta dhënë verzionin e tij. Zgjodhi të mos e bëjë.

Kjo heshtje merr peshë kur vendoset në kontekstin e hulumtimit që Gunpowder Chronicles publikoi në prill 2025¹, një seri investigative që dokumentonte jetën e dyfishtë publike dhe operative të Zekës. Ato shkrime treguan se përtej imazhit të gazetarit kritik, Zeka kishte funksionuar si ndërmjetës narrativ, si operator medial dhe si figurë e lidhur me rrjete që prodhonin dezinformim dhe presion politik. Nuk ishte një episod i izoluar, por një model i përsëritur.

Një nga faktet më të rënda të atij hulumtimi dhe i pranuar publikisht nga vetë Zeka ishte shitja e pamjeve arkivore të luftës së Kosovës një producenteje serbe², Sladana Zaric, e lidhur me transmetuesin shtetëror të Serbisë. Këto pamje, të xhiruara gjatë luftës nga vetë Zeka, u përdorën në dokumentarë që ringjallnin akuzat për trafikim organesh kundër Ushtrisë Çlirimtare të Kosovës. Këto akuza janë hedhur poshtë dhe janë shpallur të pabazuara nga gjykata me seli në Hagë që trajton krimet e luftës në Kosovë³. Megjithatë, pamjet e Zekës u bënë pjesë e një narrative propagandistike që synonte të delegjitimonte luftën çlirimtare.

Zeka ka pranuar se për këtë material ka marrë pagesë, rreth 1.950 euro, të transferuara në llogarinë bankare të bashkëshortes së tij në Tiranë. Ky fakt, i thënë prej tij, nuk kërkon interpretim. Ai ngre pyetje të thjeshta dhe të pashmangshme. Pse pagesa nuk u krye në mënyrë transparente. Pse pamjet e luftës përfunduan në produkte propagandistike serbe. Dhe si përputhet ky veprim me imazhin publik të gazetarit që pretendon se mbron të vërtetën historike të Kosovës.

Kur këto fakte vendosen pranë dokumenteve financiare të gjykatës, tabloja bëhet më e plotë dhe më shqetësuese. Pyetja nuk është vetëm nëse ka pasur shmangie tatimore, por si është ndërtuar një pasuri dhe një mënyrë jetese që nuk përputhet me të ardhurat e deklaruara dhe me realitetin ekonomik të profesionit. Hulumtimet tona kanë verifikuar se Zeka nuk ka punuar për media ndërkombëtare që do të justifikonin të ardhura të tilla. Përkundrazi, ai ka ndërtuar për vite një identitet gazetaresk që, sipas dokumenteve dhe burimeve tona, ka shërbyer si mbulesë për marrëdhënie me aktorë të errët si Halit Sahitaj, Fatmir Sheholli dhe interesa që shkojnë përtej gazetarisë⁴.

Gunpowder Chronicles i ka dhënë Milaim Zekës çdo mundësi për të folur. Dokumentet janë aty. Pyetjet janë dërguar. Heshtja e tij nuk është mungesë informacioni. Është zgjedhje. Dhe në gazetarinë investigative, ashtu siç e mëson tradita më e mirë narrative, heshtja përballë provës është pjesë e tregimit.

Kur shifrat nuk e njohin jetën që shfaqet publikisht

Kur dokumentet financiare të gjykatës lexohen në dritën e realitetit publik të jetës së Milaim Zekës, lind një hendek që nuk mbushet me retorikë.

Dokumenti gjyqësor nuk mat pasurinë totale të Milaim Zekës, por lejon një llogaritje të qartë të vlerës financiare që ai ka gjeneruar ose administruar gjatë periudhës së analizuar. Sipas ekspertizës, qarkullimi financiar i konstatuar për vitet 2012–2017 arrin në rreth 304 mijë euro të ardhura reale (€ 304,444.92), nga të cilat një pjesë e konsiderueshme nuk është deklaruar sipas detyrimeve ligjore. Kjo shumë nuk përfaqëson pasuri neto apo kapital të ruajtur, por tregon nivelin e parasë që ka kaluar përmes aktiviteteve të tij ekonomike dhe subjekteve të ndërlidhura. Edhe pas zbritjes së shpenzimeve të dokumentuara, ekspertiza konstaton se mbi 67 mijë euro detyrime tatimore dhe kontributesh kanë mbetur të papaguara, çka nënkupton një kapacitet financiar shumë më të lartë sesa ai që zakonisht prodhon profesioni i gazetarit në Kosovë gjatë së njëjtës periudhë.

Në Kosovë, të ardhurat mesatare të një gazetari, edhe pas një karriere të gjatë, rrallëherë i afrohen një niveli që lejon lëvizje të shpeshta ndërkombëtare, qëndrime të gjata jashtë vendit, shpenzime luksi dhe një stil jetese që kërkon qarkullim të vazhdueshëm parash. Dokumentet e ekspertizës flasin për dhjetëra mijëra euro të pa deklaruara. Pyetja që shtrohet nuk është abstrakte.

Nga kanë ardhur këto para dhe pse nuk janë raportuar?

Hulumtimet tona kanë verifikuar se Zeka nuk ka qenë i punësuar në media ndërkombëtare me paga të larta, nuk ka pasur kontrata afatgjata me institucione mediatike perëndimore dhe nuk ka pasur projekte të deklaruara që do t’i arsyetonin këto të ardhura. Megjithatë, profili i tij publik është ai i një figure që lëviz lirshëm në hapësira ku paratë nuk mungojnë. Ky kontrast është pikërisht ajo që e ka shtyrë gjykatën të kërkojë ekspertizë financiare dhe ajo që e shtyn një redaksi serioze të vazhdojë të pyesë.

Këtu hyn në skenë një emër që nuk është periferik në këtë histori. Fatmir Sheholli. Arrestimi i Shehollit nën dyshimet për spiunazh nuk ishte një episod i izoluar i një individi të vetëm, por një çarje në një rrjet marrëdhëniesh që për vite ka funksionuar në hije. Sipas burimeve të shumta dhe materialeve të dokumentuara⁵, Sheholli dhe Zeka kanë pasur një afërsi të vazhdueshme publike dhe private, të shfaqur në takime, dalje mediatike dhe koordinim narrativ. Ata janë parë së bashku në momente kyçe, në kohë kur Sheholli ndërtonte një profil publik të mbështjellë me simbolikë lufte dhe retorikë patriotike, ndërsa Zeka i jepte këtij profili megafonin mediatik.

Arrestimi i Shehollit ekspozoi diçka më të thellë se një dyshim penal. Ai nxori në pah mënyrën se si simbolika kombëtare, mediat dhe paratë e paqarta mund të ndërthuren për të krijuar ndikim. Burime të afërta me hetimin kanë konfirmuar se në momentin e ndalimit të Shehollit, pranë tij ishte edhe Milaim Zeka. Ndryshe nga Sheholli, Zeka nuk u mbajt në paraburgim. Sipas burimeve tona, ai arriti të shmangë ndalimin duke përdorur materiale komprometuese ndaj një prokurori të posaçëm, një detaj që nuk është provuar ende në gjykatë, por që qarkullon brenda institucioneve si shpjegim për trajtimin e diferencuar.

Kjo lidhje nuk shpjegon vetëm afërsinë personale, por ndihmon të kuptohet edhe qarkullimi i parave dhe ndikimit. Sheholli, sipas dosjeve dhe raportimeve të mëparshme, ka qenë përfitues i shumave të konsiderueshme të parave të pa dokumentuara nga struktura të sigurisë dhe fonde operative⁶. Nëse këto para kanë shërbyer për ndërtim narrativesh, protesta, mobilizim publik dhe ndërmjetësim politik, pyetja legjitime është se kush ua ka dhënë megafonin këtyre narrativave dhe kush ka përfituar prej tyre.

13 janar 2025: Fatmir Sheholli dhe Milaim Zeka së bashku në një lokal — shënimi: “Zarf i Zi si korbi… Në BBVIK të ardhshëm është mirë të jetë garues si banor.” 17 janar 2025: foto me shtrëngim duarsh — shënimi: “Sonte po hyn në Big Brother dhe nuk del 24 orë! Milaimi është vërtet show man.” 18 janar 2025: foto e ekranit nga Big Brother VIP Kosova ku Zeka shihet në gjumë — shënimi: “U knaqë Milaimi tu flejt.”

Në këtë pikë, dokumentet financiare të Zekës nuk duken më si një problem i izoluar tatimor. Ato bëhen pjesë e një tabloje më të gjerë ku gazetaria shfaqet si mbulesë, ndërsa aktiviteti real zhvillohet në kufijtë e errët mes politikës, parasë dhe ndikimit. Kur një figurë publike shfaqet vazhdimisht në shoqëri me individë që më pas arrestohen për spiunazh⁷, kur përfiton nga shitja e pamjeve të luftës te produksione propagandistike serbe, kur përballet me ekspertiza gjyqësore që konstatojnë mospërputhje financiare, atëherë pyetjet nuk janë më personale. Janë publike.

Gunpowder Chronicles i ka dhënë Milaim Zekës hapësirën për t’i adresuar këto fakte, për të shpjeguar burimin e pasurisë, marrëdhëniet e tij dhe arsyen pse emri i tij shfaqet vazhdimisht pranë dosjeve të rënda. Ai ka zgjedhur heshtjen. Por heshtja, kur përballet me dokumente, shifra dhe një histori të gjatë kontradiktash, nuk e mbyll tregimin. E thellon atë.

---

1. Një Gazetar, një Ndërmjetës dhe një Mjeshtër i Manipulimit

Milaim Zeka: dezinformues i lidhur me krimin dhe shërbimet ruse, që paguhet për të shtrembëruar narrativën e Kosovës për të goditur Tribunalin Kosovar të drejtësisë në Hagë. — Kronika B Hulumtim.

2. Postimi i Milaim Zekës në Facebook 27 Nëntor, 2024 ku ndër të tjera ai shkruan: “ ….. per nje te drejte autoriale qe “Mozaiku” i kishte dhene RTS, per perdorimin e disa pamjeve te luftes te Koshares, qe veq kane qene te shfaqura ne YouTube. Takimi eshte mbajtur ne International Prishtina Hotel. Nga Beogradi ka ardhur nje gazetare femer, nje mashkull, une, dhe gruaja ime. Pas nenshkrimit te marreveshjes, kemi rene dakort qe shuma prej 1950 euro te paguhej ne konton e nuses time ne Tirane….. “ [https://www.facebook.com/milaimzekaobri/posts/pfbid0gHfLXgqUJGP7JJLoUCyXpehv4MPXfMoevjiSYUBfQqxQzu9ivizYvQnkp46CrCGPl]

Postimi i Milaim Zekës, i arkivuar nga redaksia jonë në format PDF, lidhet me pamjet e luftës që ai ia kishte shitur producentes së Radio Televizionit të Serbisë, Sladana Zaric — [PDF File].

3. Konferencë për shtyp e ICTY (16 prill 2008) – ICTY konfirmon se asnjëherë nuk është paraqitur ndonjë provë për akuzat mbi trafikimin e organeve para trupit gjykues.​ — ICTY.

Deklaratë për shtyp e Task-Forcës Hetimore Speciale të BE-së (29 korrik 2014) – Hetuesi kryesor Clint Williamson konstaton mungesë provash të mjaftueshme për të ngritur aktakuza lidhur me trafikimin e organeve, duke theksuar se janë identifikuar vetëm raste të kufizuara.​ — Reuters.

4. Kur Gjurmët Digjitale Rrëzojnë Mohimet e Zekës dhe Sahitajt

Fotografi, fluturime dhe rrëfime të regjistruara zbulojnë gjurmët digjitale dhe dëshmitë personale që ndriçojnë lidhjet e fshehta mes Milaim Zekës dhe Halit Sahitajt. — Kronika B Hulumtim.

5. Mozaiku i Dosjes Fatmir Sheholli

Arrestimi për ‘spiunazh’ i Fatmir Shehollit, zbulon një skemë ndikimi ku simbolika e luftës, para të padokumentuara dhe rrjete mediatike relativizojnë Beogradin dhe gërvishtin institucionet e Kosovës. — Kronika B Hulumtim.

6. Republika pa Gjurmë Letre

Kosova e pas luftës u kthye në një pronë të përbashkët private: fshehtësia u bë monedhë, kalendarët u bënë mburojë, e prokurorët u bënë strehë për pushtetarët plaçkitës. — Kronika B Analizë.

7. Fatmir Sheholli Postim në Facebook, 17 Janar, 2025.

Fatmir Sheholli Postim në Facebook, 18 Janar, 2025.